CC24Zenâr#06 – La borgade dai Salvans

#06 – La borgade dai Salvans

Daprûf de mont Bernadie si viodeve un paisot, cun cuatri cjasis e une tor, cenglât  di un bosc.
Si contave, seont il sintût dai vielis che a lavin in file tes stalis de borgade dai Pagnuts, che une gnot in preterits timps, un pâr di cubiis dal aspiet primitîf, salvadis e discolçs, a jesserin di un landri di chel vert gredei e si instalarin miôr che a poderin ta chê che vuê e ven clamade la borgade dai Salvans.
Vivi li nol jere par cualsisei, la totalitât di chê briade a jerin  imparintâts tra di lôr. La consanguineitât e jere il mût di conservâ la lôr fuarte partignince a chê identitât, par lôr une vore impuartante, che e jere chê di no vê tra i pîts int foreste.
Ma, ma cul timp, a planc planchin, il mont al le fasint dai cambis, strissinant dentri di chel gorc ancje i Salvans.
Cussì al fo che i zovins di chê gjernazie a scomençarin a jessî de lôr borgade, la retoriche dai lôr vielis no veve plui fuarce di persuasion, il mont ju spietave.
Il lavadôr public dal paîs al fo un dai puescj plui rilevants che i zovins Salvans a scomençarin a frecuentâ, cjapantlu di smicje come moscjis su la mîl, stant che tai ultins timps a forin in aument, tal puest des lôr maris, chestis pivelis a rivavin cui zeis de blancjarie sporcje.
Fintremai che un zovin dai Salvans al è lât cuc te borgade dai Pagnuts.

di Fuschi
#1513