CC24Zenâr#05 – Dispetosat

#05 – Dispetosat

Cui jerial stât il prin a inacuarzisi? Cui savê! Sigûr dome che cumò dut il paîs al jere in sbisie. Il plevan robis che no i vegni un imbast, cul libri dai sconzûrs in man al veve daurman tacât a sbarâ sù jaculatoriis e devozions e maledizions cuintri il demoni che, nancje dîlu, lu veve imbastît lui chel sacrilegji, cui se no?!
– Il benandant – al cibiscje Tin, il zagut che al veve puartât la crôs in procession, matine a buinorone, inte rogazion di S. Marc – il benandant.
A planc. Ma il plevan lu sint. E i rive un sgarnof: – Dutis lis storiatis che al ti met intal cjâf to nono! Lis striis no son i benandants che ur fasin cuintri, al è il Crist!
Ma chel puar Crist di leton, il so puest al varès di sedi su la crôs, e invezit al è cumò picjât par sbighet cul braç çamp imberdeât sul ôr de curnîs de letare A di LOCANDA, in bas bande de strade. Cui se no il diaul? Ducj a confessâsi, al scampanote il plevan, ducj in pinitince di tignî lontan il malìn che al è stât bon di une tâl, altri che benandants!
Ma Tin lu veve viodût il benandant, in sacristie, che al tarmenave intor dal Crist de crôs. Un di chei dispetôs, mighe no son ducj bogns, i veve dit so nono, a son ancje di chei che a gjoldin a fâ gabis.
In procession al veve cjaminât a pâr cun lui e lu pocave, lu cjoleve vie, i faseve la gjambadorie.
– Sta atent – i cridave il predi – dulà vâstu, indurmidît! Di no lâ a sbati, cjamine dret.
– Ccrrakc!
Cuant che la crôs e jere lade a bussâ chê A, par fortune a jerin ducj che a cjantavin a peste fame et bello e nissun al veve sintût.
La crôs al jere rivât facil a disberdeâle ma nol capive ce che al veve il benandant di ridigji daûr, chel dispetosat!

di Ippogrifo
#1512