Pauli il cjaçadôr

Al è stât un croc: cheste volte lu ai sintût a clâr. No mal soi impensât. Un crevâsi di ramace tal scûr. E vonde dongje, ancje!
O savevi jo!
Velu un altri! Sacrabolt!
Biel casin.
Al è di une setemane che i tirìn la filaine a la bestie, come che aromai le clamìn. Ma no si sa ben ce che e sedi pardabon. No i somee a nissun nemâl cognossût. E e je grandonone. E juste cumò che mi soi inacuart che il gno Benelli al è blocât le sint rivâ dongje. O sai che e je la bestie.
Tal scûr neri de gnot o ai lampât daurman chê lusute rosse che si à impiât a ret dal scatarel. Figade! Al vûl dî che la sclope e je incaiade. Chest mostri di tecnologjie tal mostre prime che tu si inacuarzis di bessôl.
Biel, eh? Dome che nol covente un caz. Ce cambie?
Un altri croc.
E une svintade di flât dolcit.
Diu gno!
Il zenoli a drete al trimule planchin. Se o provi a jevâ sù no sai se lis gjambis mi tegnin. E pûr… nol è altri ce fâ.
Pôc plui indaûr di me al è il prât, lunc, ma di rive jù. Insom dal prât il casot là che a son ducj chei altris a scjaldâsi prime di tornâ fûr te gnot imbramide.
O scuen cori jù.
E sperâ di jessi plui svelt de bestie.
O jerin in doi a fâ la pueste culì, juste dentri dal bosc, ma chel cjastron di Pauli al veve di pissâ e vie lui. Cui lu aial viodût plui? Che i vignìs almancul une infezion là sot! Sigûr che al è tornât tal clip dal casot.
Une altre svintade di flât.
O scuen lâ.
E sperâ che i miei compagns a vedin buine mire.
O soi dut une tremarole!
Mi buti jù pal prât a rote di cuel clamant sbalsamât. Un alc di grues e sfladant juste daûr di me.
Il rivoc di un colp sôl al trindule framieç dal cidin. L’urli grocj de bestie che i rispuint si jeve adalt intant che e torne bande il bosc. Ma al è un grugjulâ no spasimât, che al par dabon une ridade.
Di insom dal casot Pauli che al berle di vitorie. La sclope butade par aiar e cjapade indaûr.
Al à vût buine mire il gno compagn, sì.
Juste tal mieç dal cerneli mi à becât chel dispossent, che Diu lu sfulmini!

di Gianluca Franco
#1***