La gjave di Pampalune

Ben planc, scurtant striche a striche lis zornadis e messedant i colôrs dal imbrunî, ancje chel Setembar si veve fat dongje.
In curt, il cricâ dai grîs al sarès lât a distudâsi tal lament de civuite e Bastian, la piel inrusinide dal Istât e un çuf poiât sui bruscs dal so cerneli di cuindis agns, nol sarès plui vignût a fâ il bagn te gjave di Pampalune.
E tacave la scuele, i compits, l’Invier.
Cuntun vêl di maluserie si patafà un tavan te cuesse e si butâ te aghe clipe, infondantsi e impresonant il flât tal pet, par vogâ une ultime volte fin a lenzi chê altre rive. Tirât fûr il cjâf, si movè tant che un crot ribaltât e al vierzè i voi, par cjalâ adalt, il cîl clâr parsore dai pôi dulintor.
Pene che la aghe si disgotà des pipinis, al viodè la fade.
La sacume si spostave dutun cu le sô cjalade e e svolave dal blanc al blâf. Une magle scure dulà che Bastian al intivave un cuarp di fantate e une cjavelade in riviel. Al viodeve chê magle intai voi dome dilunc dal bagn inte gjave. Tal imprin al pensà a lis ceis o un cualsisei sporchet, e no i fasè câs, ma daspò al scugnì rindisi e riferî – prime a sô mari e dopo al oculist – che la magle no leve vie e cun di plui e veve simpri chê forme.
«Nol è ce preocupâsi, siore. Un piçul distac dal vitreo, ma il voli al è une vore san e il cerviel si usarà a viodile, fasintle sparî».
Ma nol fo cussì.

Al prin bagn de stagjon dopo, Bastian al intivà une sacume diferente: nuie di mancul che un motorin. Al jere dimagrît e al veve metût sù i muscui de zoventût, lis vogadis si fasevin plui lungjis, ma la magle a forme di fade no le viodeve plui. O miôr, le viodeve, ma te realtât: si clamave Denise, e jere di Cjasteons, e ancje jê di tierce B. Si cjatavin daspò de scuele e a levin parfin te gjave, cualchi volte, pedalant e tignintsi par man. No jerin dubis che lu ves inmagât. Dal so vitreo distacât si smenteave prime ancjemò che la piel si suiàs.

L’an dopo, dut câs, al veve rivât a comprâsi il motorin; al leve ator cui amîs par sagris e di fadis al veve cognossût cetantis. Denise le veve smenteade e cumò la magle tai voi i pareve figurâ dai libris. Da rest, i mês dal an de maturitât ju passà li parsore e te gjave di Pampalune al tacà a lâ dome a Lui, par scuvierzi che il vitri de sô cjalade al veve cambiât inmò forme. Nol si maraveà cuant che cul rivâ dal frêt al tacà a vore di impleât.

E po, tai agns, une altre fade, une machine, une glesie, un frutin, un cimitieri, une biele strie, une crôs di ospedâl… Lis maglis i strolegavin i cjantons de vite. E lui, almancul une volte ad an, al vignive te gjave dome par chel, ancje cuant che al tacà a pierdi i cjavei e doprâ i ocjâi. Plui voltis, da rest, al veve za tal cjâf la magle che i sarès capitât di viodi. Cussì come che a un ciert pont al veve vude pôre di murî, se nol ves viodût nissune magle. Ma al jere durât pôc e nol veve plui mateât a domandâsi se chel misteri al fos sugjestion, fantasie o pardabon une maravee.
Il destin, al veve capît, no lu decît dal sigûr la gjave di Pampalune.

di Rafaêl Serafin
#1***