Un erôe

Voaltris no mi cognossês, e pûr centatis voltis o soi restât a cjalâus, denant dai vuestris voi incocalîts, cence che voaltris si inacuarzedis di me.
Come ducj i supererois o ai i miei podês, e deventâ invisibil al è un di chei.
O sai platâmi te code di un voli, te orele di une pagjine, cori vie svelt su lis gjambis di une g o di une p, o svolâ adalt, come un acient o come un apostrof e po colâ jù e scjampâ tant che une virgule.
Ma no je la uniche abilitât che o ai.
O sai mudâ come nuie, ma ancje come ruie; cumò dentri di une buse, cumò di une muse; e daspò di jessi riviel, o pues deventâ parfin un tiviel, cualsisei robe che al voli dî. E di dutis chestis fisionomiis, a centenârs, miârs, milions di parincis, cuissà cuâl che e je la mê, chê vere, la forme autentiche di cui che  che no si è mai pierdût dilunc de strage che e va dal cerviel al dêt.
Ma pôc al cambie, parcè che se jo mancji, no esist, ma se o soi, o soi simpri un erôe… Un erôe di batidure.

di Rafaêl Serafin
#1***