Domandis

L’om al blesteme di bessôl, tal scûr.
Al cjale il cîl neri e al domande perdon.
Si cjale lis mans cence viodilis e si domande cemût.
Al cjale ator ator e si domande dulà che e je la justizie.
Si cjale dentri e si domande parcè.
Il zîr des domandis al va indevant di oris. Perdon, cemût, dulà, parcè.
Un rai di soreli al tocje i cjavei blancs dal om tant che un lamp che i slusore lis mans. Cussì al capìs cemût. Cuntun curtis.
A tornin lis domandis. Perdon, dulà, parcè.
Un uciel al svole scaturît. Pôcs seconts daspò i rive ancje al om un sun che al cres sù e jù, ancjemò lontan.
La justizie e je dongje. A rivaran sù, cumò al sa dulà.
A son restadis dome dôs domandis. Par savê parcè al à di domandâsi par prin cui. Il perdon al rive daspò.
Il cîl cumò al è clâr, i lasse viodi i arbui e ce che al è sot. I cjavei ingredeâts, colade tant che une pipinute rote, lis mans sore il stomi par difindi chê robe che nol dovarès mai sucedi.
Alore al à capît cui e parcè. E jere plene e lui no lu varès mai permetût.
Jê e jere dome sô e di nissun.
“Ti ai fat jo e cumò ti ai ancje disfate!”, la blesteme finâl.
Un nûl al platà il soreli e il scûr al torne daurman.
Al torne a cjalâ il cîl e il neri dal so cûr.
Al om i è restât dome di domandâ il perdon.
Ma chel nol i rivarà mai.