Il cûr

E insome o corevi par chê stradele. Ogni tant o cjatavi scovacis. E jere une rovede di cariole. Po o rivai te tiere di Bepi in Asins. Al bateve cu lis sôs dîs mietitrebiis a vapôr ma no lui: i soi operaris. Lui al controlave lis gjambis de blave a campion. Al veve un cilindri sul cjâf e une casselute daûr de schene. E jere di ram e plene di indicatôrs. Bepi al veve un orloi sul cûr. Se si fermave al murive ancje lui. Ogni tant al rivave un servidôr namibian a tirâi sù la clavute che Bepi al veve daûr de schene e che e jere colegade cul cûr-orloi. Al jere gjelôs des sôs tieris e jo lis sghindavi lant daûr a un frut in bici. O jeri in bici ancje jo. Rivât te cort di Asins, li de gleseute, o viodei un passudon cu la barbe che al pocave une bacheche di veri, di chês cu lis informazions. I disei di dut. Po al veve cjapât in man un canocjâl public. E al domandave a un inservient cemût doprâlu. Insome, a ’nd jere di mats ator. Bon, o fevelavi cun dôs feminis te cort di Asins e ancje cun chel frut in bici. Si fevelave dal guviernatôr dal Karakalpakstan, Gawronsky, in visite in Esperie.  E dopo si sintì sunâ une svee… drinnnnnn drinnnnnn! Il rumôr si sintive fin inte cort che e jere cunfinante cu lis tieris di Bepi.
E lis dîs mietitrebiis si fermarin.
Il cûr/orloi di Bepi si jere fermât dant i ultins drins e di conseguence dut chel mont agricul nol sarès lât indevant cence di lui.
No capivi parcè che Bepi al continuàs a vivi cuntun cûr a suste che al leve simpri cjariât. E sì che al jere plen di bêçs.
Parfin jo, che no soi sioron, mi soi fat instalâ un cûr a energjie atomiche. Chel al è eterni e no varai mai problemis…

di Checo Tam
#1***

1 comment