Il Quiz dai Mês a Montenars

E o sin un tic tarts ma no podìn no contâus alc de serade di domenie a Montenars, li dal Agriturisim Al Tulin, sot dai pîts dal Cuarnan, devant di un cîl dal mont inmagât dal imbrunî.

Eh, sì, parcè che e je stade la prime jessude dal nestri gnûf spetacul par presentâ il libri “Lis Contis dal Mês” che al pâr propite vê vût un bon acet (O vin provis siguris che al è rivât bielzâ intes Americhis di sot e di sore). E ce vino fat par difondi il nestri lavôr? Ma clare… un spetacul! E par jessi plui precîs un spetacul a quiz, in standard televisîf moderni e vivarôs (telefriûl spostiti) che al tirave dongje di dut: leturis senichis, teatri di paîs, snait, culture furlane…

La locandine e jere za avonde clare, ma par cui che nol jere ae serade e nol à podût gjoldi de supermaraveose cene prontade di chei dal Tulin cumò a contìn dut.

Alore… tant par scomençâ la serade e je stade une vore dificile. A jerin passâts dal copion A, al copion B – par vie di un famei timit – e dopo al copion C – par vie di une Sartore cu la fiere –  e a stavin par disperazion par cirî un copion D, par vie di une Coghe incjastrade in code su la pontebane… insome… robis di cagâsi intor, ma noaltris o sin ben usâts a improvisâ e… nissun si è inacuarzût di nuie!

Sì che, ce isal sucedût? Bon, tant par scomençâ la presentadore Fogolina Sereni – innomenade – e je stade super e plene di cjacare, tignint sù dut il spetacul insiemi cul FEF, il Furlan Espert di Friûl Londaar Micheli, che al saveve propite dut, ma dut, su ogni argoment. E i concorints, Galleria Giorgi e Serafino Rafaelli, no parevin di mancul, intal rispuindi a lis domandis fatis dopo lis leturis di Tamo Franceschi.

O ben… al va dit che un concorint al pareve un tic… impreparât, ma al veve une vore di cool e al à tignût bot fintremai ae fin de gare, lant a risi ancje di vincile (e nol varès fat content nissun, al pâr). Ma dut al è ben ce che al va ben e dopo une sfide a domandis une vore dificilis sui mês di Fevrâr, di Jugn e di Otubar, la concorinte Galleria e je rivade adore a paregjâ cuntune ultime domande sul mês di Dicembar.

E in dut chest quiz si è fevelât di une vore di robis: di tomâts, di jerbis, di muarts, di sagris, di again intal mês di Dicembar… e su dut l’espert di furlan, cun in man il so test di riferiment, al furnive informazions e culture. E come che o viodês di chestis fotografiis, o vevin ancje il Muini a documentâ dut.

Ce altris dî? Une vore di robis! Tipo che o vevin une strumentazion une vore tecnologjiche, come un tabelon galatic par segnâ i ponts, une valete superfrice e doi botons di prenotazion de rispueste superfigos. O tipo che o vevin ancje une metodologjie super inovative par sielzi il mês sul cuâl fâ lis domandis. O ancje che al somee che intal cast al sedi stât platât un latitant misteriôs, o che… vonde! Us vin dite bielzà avonde e insome… chest al è dome il prin spetacul di une tournee che e puartarà ator il nestri libri plen di narative e folclôr… e voaltris lu vêso? Proviodêt!