CORSECURTE 2022: NONS E CLASSIFICHIS!

E je propite vignude la ore di disvelâ dut! Ducj i nons che si platavin daûr des scuadris de CorseCurte, la classifiche definitive dal FantaCorseCurte e de competizion. I premis che a son stâts vinçûts e ancje un pocje di croniche de serade di îr, là di Pituel, cu la super cene che o vin metût adun che e je lade, nus pâr, une vore ben!

Une robe per volte… Tachìn cu la classifiche dal FantaCorseCurte!

E je stade la competizion plui imprevedibile, stant che il vincidôr al è stât sielzût de ultime zornade di campionât e i prins cuatri a son dentri di une desene di ponts. E la classifiche, cun di plui, si è ribaltade intai prins trê puescj.

Noemi Salva, prime, ma cun dome doi ponts di vantaç su chei doi che i corevin daûr, e je lade a finîle tierce, cu la sodisfazion di vê vût un tierç puest pardabon valit, e tignint indaûr il Volketitrai-Liga, che dopo i siei bogns risultâts te classifiche gjenerâl al voleve vinci ancje ca.

Ma lis primis dôs in classifiche son altris dôs feminis e a son dôs letoris che no partecipavin ae CorseCurte. Cui? Al secont puest Nene, ven a stâi Madalene Cogoi, che e à let dutis lis contis e e je stade simpri presint intes votazions. E al prin puest la gjatemarangule, ven a stâi Giorgia Gallerio, no cate coreografe e disegnadore dai diplomis de CorseCurte, che e à vinçût la cene! Ma il biel al è che a son ben 6 personis che a àn votât ogni mês e une altre biele grampe che a àn mancjât di votâ dome une volte. E noaltris o pensìn che jessi rivâts a fâ lei lis contis a cussì tancj al è pardabon un biel sucès… Il FantaCorseCurte al è stât propit une gran biele idee!

Une menzion a part e va fate par il plui puntuâl letôr e comentadôr Lussian, che al à comentadis dutis, ma propite dutis, lis contis de competizion (a part lis sôs, clare) e ancje se us pâr che nol vedi votât ogni mês… no je vere. Ogni tant al falave di firmâsi e lu cjatais tant che Potonsio… ma al è ancje lui simpri presint a lei e votâ.

Ma e je vignude la ore de CLASSIFICHE FINÂL… Dopo 12 zornadis di campionât, un totâl di 273 contis, une medie di cuasi 23 contis al mês…

Note: la percentual dal 100% e sarès saltade fûr se un al fos stât simpri prin in ogni zornade di campionât

Al vinç la Prime (e ultime) edizion de CorseCurte 2022, la scuadre dal CJICECHEPICJEDISPICJELACITE, simpri presint, e cuntune medie di eficacie dal 94,8%, ven a stâi, simpri tai prins puescj a ogni zornade. Cu lis sôs contis di un furlan sior e vivarôs, simpri ben pesadis, cun storiis dispès maluseriosis la vitorie e pâr meretadissime. La scuadre e je stade a cjâf de classifiche de prime ae ultime zornade e a di part di un moment dilunc dal Istât, cuntune piçule flession di rendiment, e à comedât ducj i inseguidôrs un par un, cuntune marcie drete e impressionante. E à rivât dispès a meti dacuardi la zurie dal public e chê di cualitât e nol è passât mês che no vedi une votazion tal fantacorsecurte. Cun di plui, par ben cuatri voltis, a Zenâr, Avrîl, Mai e Dicembar e à vinçude la zornade.

Al secont puest, cul merit di vê tignude vive la gare, stant che te ultime zornade al podeve ancjemò pontâ ae vitorie, o vin il BORUSSIA DORDUL. Ancje lui simpri presint al à mostrât une incressite costante intal cors dal an, cun cualchi ponte di gjeniâl surealitât che e à comedât ducj (la vitorie tal mês di Març e di Avost, par esempli). Cu lis sôs storiis che dispès a lavin ator pe fantasie (dal sociâl o dal sureâl) e cuntun furlan di gale che al miorave volte par volte al pues pardabon sta content. Un secont puest che al è rivât ancje pe perseverance, mês par mês, a mandâ simpri une conte di bon nivel.

Al tierç puest, cuntun colp di code finâl che al à profitât des scuadris che a àn molât ae fin, o vin il VOLKETITREI-LIGA. Scuadre simpri presint e che e à vût te fantasience sociâl il fîl ros che al peave lis sôs contis si è vuadagnade il tierç puest cence rivâ mai a vinci un mês ma rivant a vê une percentuâl di eficacie une vore alte (plui dal 80%!). Il Volketitrei-Liga, soredut te seconde metât dal an, al à il merit di vê cirût simpri di tirâ fûr une idee. Che dopo e sedi plasude o mancul, o magari che no vedi cjatât simpri la realizazion perfete, al pues ancje stâi, ma al à il merit di vê puartât dentri une vore di aiar fresc inte competizion.

La uniche scuadre a vê passât i dusinte ponts insiemi a chês dal podi, al cuart puest o cjatin l’ATLETIC GJATUI! Grandis intuizions par cheste scuadre che è à vinçût nuiemancul che doi mês e che tantis voltis e à vût storiis delicadis e fatis di insium e bielis sfumaduris. Tal imprin, forsit ancjemò no convinte dai siei mieçs, si è lassade indaûr cualchi pont cun cualchi conte debile, ma cuant che si è inviade, te seconde part dal an, e je simpri rivade tai prins. Insome… un cuart puest cjapât in rincorse, e par chest che al dà dal sigûr une vore di sodisfazion!

E al cuint puest o vin une altre scuadre che e à fat un piçul cjâf di opare, il LUPUSINFABULA! Scuadre che e je stade buine di vinci nuiemancul che trê zornadis (Lui, Setembar e Otubar) e che se no ves vût une partence masse cuiete e sarès rivade a jessi in gare adiriture pe vitorie. Cualchi sô conte cuasi nichiliste e cence pêi su la lenghe e je ancjemò ben plantade tal cjâf de zurie… Nol sarà chel che al vinç il premi dal public, ma la maniere come che al ponte il dêt su lis debilecis dal om e je pardabon di gale. Nus à regalât des gran bielis contis.

E a van spindudis dôs peraulis ancje sul REAL COCÂL, parcè che fin al mês di Setembar al jere in gare par il prin puest e ae fin al è rivât sest cence partecipâ a lis ultimis dôs zornadis. Par almancul mieç an al è stât li a zuiâsi il prin puest cul Cjicechepicjedispicjelacite e dome la dificoltât al cjatâ il timp par scrivi lu à fermât. Dal sigûr une des scuadris plui preseadis, tant al è vêr che des 10 zornadis che al à partecipât al à vinçudis dôs.

Al puest numar 7 e 8 o vin dôs scuadris che nus àn regalât simpri bielis contis, ven a stâi il SBREGHEBALON, cu lis sôs storiis dispès ironichis e plenis di dialics, e il COPASSE BLU, mestre tes contis romantichis e furlanis. Cun dut di alts e bas, a son dôs scuadris simpri presintis e che cualchi volte a son ladis pardabon dongje a rivâ dal cjâf de classifiche. Contecurtârs di tignî di voli e di tornâ a lei!

E une biele sodisfazion se gjave ancje il SPORTING BRUGNUL, al numar 9, ven a stâi di vê vinçût la zornade di Fevrâr, cuntun exploit che nol à mai plui ripetût ma che cu la sô regolaritât lu à puartât istès dentri dai prins dîs. Lis contis, cualchi volte ancje masse retorichis, a son ladis ben o mancul ben, ma une idee, dentri, a cirivin simpri di vêle.

E al decim puest o vin il VECJO CLAES, penalizât dal sô furlan cun revocs dal forest e borgesians, ma plen di ideis, cualchi volte ancje masse. Brâf.

E brâf ancje il PASSARUTE, pene sot, simpri presint e cun plui di cualchi conte ben jessude.

E i compliments a van ancje al BARBA PISUL STENTADIZZA, che al sarès ben plui sù se nol ves molât intal ultin trimestri; e al ROSUTE PELOTE, che e à fat i salts mortâi par jessi presinte ogni mês e cualchi volte e à poiât jù des contis une vore furlanis.

E ancje se o sin te mieze classifiche, o vin scuadris che a àn il merit di jessi stadis simpri presintis o cuasi e a son il TAPIOCA CITY, IL GJALINE PADOANE, IL SCALEMBRUT, L’ARGO PATUS E IL SICHEDUNCJE. 

E plui indaûr une note di merit e va al IL FI DI MARIE DAL CAFE’ che e je la scuadre che e à scrit plui caratars, fat che i à costât ancje plui penalizazions, ma che no le à fermade intal so stîl.

E un note ancje par il DILETANT IN SBANDAMENT, jentrât a competizion inviade, ma dopo simpri presint e che al à ancje inviade la “saghe di Palme”.

E ben ancje il CUELALT, che al à provât a scrivi, ancje se a sangloç, ma nol è rivât nancje tant indaûr.

Tal mieç, cui prime cui dopo, cui cun plui partecipazions, cui cuntune sole, o vin vût chês altris scuadris, (MOTOGUZZI, ACUARICENCEBRANCHIS, LUNE PLATADE, LA SFORADIE...) e o sperin che si sedin divertûts ducj.

Ultime menzion par la scuadre dal POTONZIO, che e à partecipât savint di no rivâ mai diferente di ultime, (o cuasi) ma lu à fat par spirt di poie ae nestre Ostarie…e graciis Potonsio.

Ma ce àno vinçût i prins trê?

Trê zeis! Trê zeis cun dentri un cussin artizanâl fat de mari dal Ostîr, la marmelade di kumquot, une butilie di vin e un salam di Pituel, e un diplome fat a man de gjatemarangule cul logo orent de CorseCurte (che al è lât ancje a chei che a jerin ae cene) e che us fasìn viodi ca sot (disvelant une identitât).

Ma… no ise ore di disvelâju ducj, chescj nons? E alore vele ca la liste dai partecipants ae Contecurte:

1. Il Cjicechepicjedispicjelacite e jere SERENA FOGOLINI
2. il Borussia Dordul al jere RUDY CITOSSI
3. il Volketitrei-Liga e jere MARGARITE COGOI
4. l’Atletic Gjatui e jere ASTRID VIRILI
5. il Lupusinfabula al jere LAURIN ZUAN NARDIN
6. il Real Cocâl al jere ALESSANDRO VALOPPI
7. Il Sbreghebalon al jere MASSIM FURLAN
8. Il Copasse Blu e jere SILVA GANZITTI
9. Il Sporting Brugnul al jere MICHÊL LONDAR
10. Il Vecjo Claes al jere ZORÇ CESARATTO
11. Il Passarute e jere NOEMI SALVA
12. Il Barba Pisul Stentadizza al jere ENRICO TOMASI
13. Il Rosute Pelote e jere OLGHE COSSAR
14. Il Tapioca City al jere CHECO TAM
15. Il Scalembrut al jere LENART GJAVEDON
16. Il Sicheduncje al jere GALLIANO DI BUENOS AIRES
17. Il Gjaline Padoane e jere PIERINA GALLINA
18. L’Argo Patùs al jere MARCELO DEL MESTRE
19. Il Motoguzzi e jere ELEONORA GREGORAT
20. Il Diletant in Sbandament al jere LUCA BAGNAROL
21. Il Fi di Marie dal Cafè al jere RENZO TURUS
22. Il Cuelalt al jere TOMMASO PASCOLO
23. La Sforadie e jere CECILIA LIVA
24. Il Lune Platade e jere CRISTINA DEGLI UOMINI
25. Il Stale Rosse di Scodevacje al jere FERDINANT PASSON
26. Il Nene Furlane e jere IRENE LESIZZA
27. L’Acuari cence branchiis al jere EDUART BASCHERA
28. Il Potonzio al jere LUCIANO MARINIG
29. Il Boraite Falconete al jere MASSIMO ROMANUTTI

E cumò nus pâr propit di vê finît. Cun calme o scrivarin i nons ta dutis lis contis e o lassarìn la scuadre dome sot dal test, di maniere che o podedis lei dutis lis contis dai autôrs savint cui che a son.

O sperin che cheste iniziative e sedi plasude a ducj, sedi chei dentri, sedi chei fûr, e se o vês voie di lassâ cualchi coment, soredut voaltris partecipants, no sarès propite une brute idee…