CorseCurteNovembar#18 – Come la liende

#18 – Come la liende

Plasê, Fabrizio.
Alba. Ce fâstu te vite?
Lobbying. (al riduce, un tic rogant)
Ah! No ai mai capît di precîs ce che al vûl dî. (e somee dubiose)
Bon, disìn che par lavôr o puarti indevant i interès de mê aziende tes istituzions. Guviers, istituzions internazionâls…
Mmm, okay… Ce aziende? Scuse se soi curiose!
Sêstu une gjornaliste? (al rît) Une grande societât multinazionâl che dalsigûr tu cognossis.
Mmm… dimi, dai!
ENI. Cumò o lavori a Bruxelles ma o ai lavorât par agns in Afriche.
Ah… A corompi i Guviers, armâ lis miliziis o a copâ i oposidôrs?
Ihh, ancje tu une di chês?
Di chês cualis?
Pensistu di ve la justizie de tô bande?
Beh, amancul jo no lavori par une societât responsabile di tantis malefatis. Coruzion, pressions, copadicis… No ti sintistu nancje un pôc responsabil di dut chest?
No disarès propite! Jo no ai mai fat nuie di ilegâl. E se lu ves fat, ma lu soi dismenteât.
Ah, benon propite…
Âstu finit di fâmi la morâl? Ise une fieste o un confessionâl?
Sì, ai finît, scuse, in efiets no ai nissun dirit di fevelâti cussì. Ma tu mi fasis rabiâ!
Pensi di vê un primât, su chest, cu lis feminis pesantis come te.
Bon dai… mi rint. (e riduce) Mi ordenistu un gin tonic par fâti perdonâ?
Ah, cussì, eh? (al rît e al clame la camarele) Portaci subito un gin tonic e un cognac!
Lis robis a lerin indevant come che ogni tant al sucêt: cence nissun sens logjic. A jê, insom, i plaseve chel so mût cussì lontan dal so di vivi lizêr, di un che un dì al podarès scjafoiâ une persone e subit dopo lâ fûr a cene cence pinsîrs. E lui al veve voie di cjapâle par tignile sot e insegnâi cemût che si compuartisi intun mont che no ti regale nuie.

Cuant che Alba si cjatà te lussuose cjamare 404 dal hotel Astoria e veve za avonde alcul tal cuarp par no visâsal ben.
Daûr di jê, Fabrizio al sierà la puarte.
Jê si discrotâ e si distirà sul jet. Lui le viodè, blancje e luminose, un cuarp lusint sui bleons neris. E al murì cussì, devant di Alba, propit cemût che e dîs la liende.

di ***
#1***