CorseCurteNovembar#13 – Sclesis

#13 – Sclesis

La fumate e cercene lis sacumis de plane impisulide. Il paîs al polse in spiete de lûs, ma pes stradis al è za cui che al baline ator. Il pas lizêr al crite parsore de bruse. “Al devi jessi par chest che lu clamin cricâ dì”, si dîs Argjie biel che i prins rais di soreli a travanin chê sfilzade blancje. I siei scarpets a scjavacin la distese cence lassâ olmis.
Nando i cride simpri cuant che e salte fûr di cjase cun chês çavatutis, ma jê no si rint di meti sù lis dalminis, plui saldis e soredut cence pericui di implombâsi i pîts. Al è che cun chei trampui i pâr simpri di inçopedâsi.
Dal rest, ce podaressial capî Nando, dut cjapât dai cjamps e des bestiis… Ancje cumò, al è za jessût par lâ a fâ lens te boschete. Al è lât vie cussì di presse che si è dismenteât il gustâ. Argjie e podarès lassâ che si rangji, ma ae fin, daûr dal so trugnâ, ancje a lui i fasarà plasê chê sorprese.
I fasarà ben ancje a jê un pocje di compagnie. No va cuasi mai fûr di cuant che… Pôc ce vaîsi intor, i fruts a son dons dal Signôr e Lui al veve volude Mariute di gnûf cun se. Nol jere stât facil, dut câs, e i jere volût un bon toc, prime di tornâ incà, e istès al pareve che ogni tant e mancjàs cualchi sclese, te conte dai siei dîs.
Dute cjapade dai malpinsîrs, no si rint nancje cont che e à metût il pît suntune poce glaçade. Ghignis sustosis si vierzin des crevaduris te lastre. I scarpets a son strafonts.
Cuant che e rive te boschete, i oms le cjalin stranîts. No ‘nd è un che e cognossi. Nando nol è.
Un omenat cu la cjapiele largje le cjape e le strissine tune machine. Ma ce dal diaul sucedial? “Siore, le meni cjase. Che no stedi a preocupâsi”. “Nando, Nando!”. “Mi displâs, siore!” i dîs lui di sot la cjapiele, biel che le fâs dismontâ. No je cjase. A son difûr dal cimitieri. Il pît al torne parsore de lastre. Crevaduris si vierzin tal cûr intant che Argjie si vise de sere che Nando nol è plui tornât. I uciei a zornin plens di vite intant che jê e cole parsore de tombe dal so om.

di ***
#1***

3 comments On CorseCurteNovembar#13 – Sclesis

Leave a reply:

Your email address will not be published.

This site uses Akismet to reduce spam. Learn how your comment data is processed.

Pît di pagjine dal sît