Suns Europe Festival 2022

Mandi a ducj, amîs di Contecurte!

Ce fasêso ai 26 di chest mês, sot sere? Vêso voie di lâ a viodi acl di gnûf o di tornâ a viodi alc che magari o cognossevis ben ma che si sês dismenteâts cemût che al jere? Bon, fasinle curte, come che si conven a noaltris de osterie. Sabide di sere, ai 26, tal teatron di Udin, o sin pronts al festival di musiche in lenghis minoritariis plui innomenât in Europe e che dut câs si davuelç… a Udin: SUNS EUROPE.

E dopo doi agns di polse o edizions cun cualchi sfighe e limitazion al è biel viodi che si torne in plene, cuntune edizion vivarose e plene di snait o insome, chestiS almancul a son lis premessis. Ma po, il snaiT, al vignarà soredut de int che e decît di lâ al teatron, stant che al sarès pardabon biel jemplâlu e gjoldisi une serade di musiche e spetacul e di scolte di altris lenghis e sunôrs diferents di chei che o sin usâts.

Se no savês ben di ce che o stin fevelant, lait su sît uficiâl di Suns Europe, e li o cjatais dut. Ma se no sês passionâts di mateâ cul ordenadôr, o podês simpri lâ su la fiducie. Il biliet si compre achì sul sît di vivatichet, ma o podês ancje lâ drets a fâ un scjampon al teatron intai oraris de bilieterie e cjoilu li.

Po dopo, se cualchidun al pense che la musiche no i interessi, nol è un festival che al fevele dome di musiche. Si impare simpri alc, si scuvierç alc di gnûf, si cognòs alc che no si saveve di lui. Par solit, almancul, al è cussì. Si torne fûr dal teatri, in sumis, (personis) miôr di cemût che si jere jentrâts. E nol è propit un fat di no preseâ, in di di vuê, dulà che ae fin zornade a son cetantis lis voltis che no sin personis miôr di cemût che le vevin tacade.

Bon… vonde predicjis. Si viodìn a Suns, e magari, dopo, o nin ducj insiemi a bevi alc.

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît