Premi San Simon e dulintor

Insome… Cemût isal lâts il plui innomenât Premi Leterari furlan, che ai 28 di chest mês al rivave ae sô edizion numar 43, dediade al romanç e ancje aes contis a fumuts.

GIANLUCA FRANCO!

ve chi, o fasìn ancje no il zugut di gjavâ vie dute la suspence dal articul e spiâ daurman cemût che je lade prime ancjemò di dî dut il rest. Ma no… ma no… no stêt vê pôre, anin par ordin. Us contìn dut e ancje di plui (anzit, lu à bielzà fat la Sartore sul Ponte).

Alore. Il vincidôr al è stât propite lui, il nestri contecurtâr Zuanluche Franc, zurât de CorseCurte, che al è rivât a 4rt San Simons vinçûts cul romanç “UNE STORIE SOLE” publicât de SFF e che o podês lei e gjoldi cun tant di cuvierte di un cuadri dediât dal pitôr di Cjaprive Sergio Altieri.

Ma come che o savês, Zuanluche e l’Ostîr, ogni tant, a son tant che il gjat e la bolp e difati ve chi une foto inedite che i à fate l’ostîr intant che l’autôr al festegje cuntune meretade bire propite subit daûr di vê vinçût il premi (che forsit achì si jere pene inacuarzût). La foto, clare, lui nol sa che i è stade fate, e da rest, e je stade une serade impegnative par dute la nestre clape, che e à – podìn ben dîlu – dominât il premi.

E alore, sicome o vin voie di savê lis robis fasint lis domandis propit ai autôrs, ve chi che o sin lâst a cirîiu e i vin dite di spiegânus, in struc, di ce che al fevele pardabon il lôrlibri. Ve chi ce che nus àn rispuindût, a scomençâ propite dal vincidôr, che nus dîs:

GF: Al è un romanç fat sù parsore di une poesie di Borges (I juscj):

Un om ch’al colte il so broili, come ch’al voleve Voltaire.
Cui ch’al è content che su le Tiere e sei la musiche
Cui ch’al scuvierç cun gust une etimologjie.
Doi impleâts che intune ostarie a zuin incidins ai scacs.
Il ceramist ch’al viôt denant trat un colôr e une forme.
Il stampadôr ch’al compon ben cheste pagjine, che salacor no i plâs.
Une femine e un om ch’a lein lis ultimis tiercinis di un ciert cjant.
Cui ch’al figote une besteute indurmidide.
Cui ch’al scuse o ch’al vûl fâ bon un mâl che i àn fat.
Cui ch’al è content che su la Tiere al sei Stevenson.
Cui ch’al à miôr ch’a vedin reson chei altris.
Cheste int, che ducj no san, e sta salvant il mont.

cun personaçs chei nomenâts te poesie, che a son dutis personis che pal solit no si notin tant, che a restin simpri un tic in bande, sul ôr, parcè che lis lôr vitis a son fruçadis dal mâl, il mâl comun e cuotidian, banâl, dal om cuintri l’om. Lis lôr storiis, in sumis, a son declinazions diferentis di une storie sole. 
Ma a la fin a son lôr che ducj adun a àn il podê di sghindâ un pericul che al podarès jessi dabon grivi pal mont intîr (e ce altri se no un virus?). E a puedin fâlu in gracie di une fuarce positive, chê de solidarietât fuarte dei compagns di scuele par Lucio (solidarietât che si manifeste simpri cul cjantâ a gose vierte l’imni dal Liverpool “You’ll never walk alone”) che e rive par un nuie a discjadenâ une serie di events che a cambiin il destin di ducj.
E in sumis… COMPLIMENTS A ZUANLUCHE! 
(Il giovane scrittore e neofita del friulano, ma cheste le capissin dome chei che a jerin vinars e che a lein i gjornâi 😀 )
Dut ca? Eh no. Parcè che a son ancje doi romançs segnalâts de Zurie e induvinait cui che a son i autôrs?
Ben po, il prin al è nuiemancul che Checo Tam, Famei de nestre Ostarie, che al à scrit “LUNE ROSSE COMANCHE” e ancje a lui o sin lâts a domandâi di ce che al fevele il so romanç.
Ve chi ce che nus à contât:
CT: LUNE ROSSE COMANCHE al è un titul ispirât a Tex Willer. Derivât di un insium di fantasimis dal 2007 lui ai tacât a scrivi dîs agns dopo e tignût fer par un pieç. Si trate di dôs (o plui) realtâts intune. Une storie dai agns ’50 che si ferme daurman, sostituide di une realtât alternative, ven a stâi di une aventure cun ambientazion tal Messico dai narcos, des catacombis, dal chupacabra, cun senis in stîl “road movie” venadis di psichedelie. Plui tart la storie dai agns ’50 e torne cui stes personaçs dal road movie e a la fin no si sa cuale che e je chê reâl, probabilmentri nissune, se si cjale l’incipit. Un romanç lizêr, cun peraulis modernis, di norme, tancj dialics. Insome, un film cence imagjinis…
E stant che il Checo nol è podût vignî ae presentazion (al pâr che i sedi vignût il mâl di schene cjavalcjant inte gnot par cirî di stâi daûr a un chupacabra super salvadi) al à vût gust di lassânus alc di plui, sul so lavôr segnalât. Ve chi ce che nus conte:

Finide ca? Eh no, nol è vonde. Al è ancje un altri segnalât, pe categorie dai romançs (che e à viodût 9 partecipants) ven a stâi il nestri Ostîr, che al è facil di domandâi alc, stant che lu vin in cjase. Sì che, Rafaêl, continus alc di ZARATON.

RS: Alore… Zaraton al è un romanç che al somee di fantasience ma invezit al è un romanç simbolic che al fevele di riscjaldament globâl, di sostenibilitât, di decressite, dal vivi mâl e dal vivi ben e di cemût che la sfide al podê dâ un futûr a chest planet e ai umans e pues jessi vinçude, o almancul si pues provâ, dome tirant dongje dutis lis gjenerazions e partint dal bas, des fondis, des lidrîs e de part plui vere e nete di ognidun di nô. Podopo la vicende e je fuarte: il Friûl al è un zaratan (une vore bocon, un zaraton, apont), ven a stâi une creature bocognone, une sorte di copasse che e duâr par miârs di agns e si disvee dutun bot, tacant a vogâ ator pal mont, cundut ce che al sucedarès a nivel di “media” di “social” e di gestion mondiâl dal fenomeni se une robe cussì e sucedès pardabon. I furlans a morin cuasi ducj, ma in chel cuasi al reste alc, une semence, la soluzions par salvânus… la storie e tache cussì, e dulà che e va lu viodarin no tant intes pagjinis dal libri, ma intal lâ indenant de umanitât… se e larà indenant.

Benon! No, anzit, nancje tant ben, ma al pâr propit che a Ostîr e Famei no i mancji la fantasie e la voie di inmagâ. O sperìn propite che i lôr progjets a podin deventâ libris.

E no nus reste che sierâ cul premi al Fumut. Al à vinçût une altre cognossince di Contecurte… Lorenzo Marangone, che nus à regalât un dissen bielonon par la conte dal mês di Dicembar, e che al à regalât i dissens a Cryptofriûl, insiemi cuntune sô amie, Giulia Stirpe

Anìn ancje in chest câs a domandâi alc al autôr. Laurinç, Julie containus alc!

LM-GS: Alore, lassìn pierdi la stiçade di Rafaêl (intun bar di Codroip) che al à tacât a scrivi ae fin di Mai e nus mandave i audio dai cjapitui man a man che ju scriveve e noaltris o vevin di stâi daûr o spietâ e decidi cemût modificâ la sô storie par fâle deventâ fumut. Di chê storie us varà za contât lui e il libri, a noaltris che no lu vin let ma lu vin “scoltât” nus è plasût une vore e la idee di dâi vite come graphic novel nus stiçave.

La colaborazion fra me e Giulia invezit e je tacade intun bar di Udin, dulà che par une buine ore e mieze o vin cjacarât di cemût meti adun la vore, cuale part grafiche che nus plaseve di plui, cuâi fumuts che a podevin cjapâ a riferiment, par contâ cheste storie. Po dopo, stant che o vin stîi dal dut diferents, o vin decidût di dividisi il lavôr, Giulia e faseve la line-art e jo o fasevi i “bozzetti” e coloravi i dissens, il dut lant daûr dai audio. In doi invezit a decidevin il storyboard des senis. Une vore divertente la tirade finâl, stant che intune setemane o vin rivât a sierâ la storie e al someave propite che no rivassin e invezit… e je vignude una graphic novel ancje avonde biele!

1 coments On Premi San Simon e dulintor

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît