Intun magjic paisut

Intun paisut ingrampât sore un çuc, la vite e sbrissave vie cuiete. Di origjin medievâl, al jere insiorât cuntune cente e toratis che a spiçavin te campagne dulintor.
Lis piçulis buteghis dal borc a levin sierant, glotudis dai grancj emporis citadins, e la vite in gjenerâl si leve indebilint, ma il paisut, cun lis sôs vieris stradutis e i grues mûrs, al veve la sô magjie.
Jenfri i varis edificis che e contignive la place grande, al jere un piçul teatri ae antighe dulà che, tai siei timps di splendôr, a vevin cjantât e recitât grandis figuris. Vuê al jere sierât, ma lu stes si fevelave di lui cuntun ciert rispiet. Tal mieç de place e di face al teatri, sore un pedestal si viodeve la statue di Giuseppe Verdi, te man drete al veve une batude, cun chê paronance e signorie che al à simpri vût direzint la orchestre.
Tai nestris timps la funzion si davuelzeve te place cun la int dal paîs. I fruts a zuiavin di ce che ur vignive. Il devant dal municipi si jere trasformât intun puest adat par protestâ. Vuê a jerin oms domandant lavôr, doman a saran feminis perorant pai lôr dirits, passant doman chei o chei altris…, ducj i dîs tu vevis la place plene. Però cuant che e rivave gnot, il lûc si svuedave e e tornave la calme. Dutis lis comparsis a tornavin a cjase lôr e dutis lis lûs si distudavin.
Il sipari al calave sierant il prin at de zornade. Il cidinôr al jemplave la place…
Però in chel paisut magjic, se tu tu ti intivavis a passâ par dongje dal teatri, tu varessis percepît il sunsûr des vôs che a parevin rivâ di oltran. O vin simpri savût che il teatri al à une anime, che dilunc il dì e duar, ma che di gnot si svee.
E cussì al sucedeve, lis lûs dal senari si impiavin. I cjantants, i musics e i senografs si levin preparant par meti inpins une presentazion. Tal camarin la soprane e gorghizave la ultime prove, la costumiste i strenzeve il bustin cun dai ponte pets. Ducj a jerin tai lôr puescj. Un lunc e fuart batimans al saludà la jentrade dal diretôr che, une volte cidinade la platee, al alçà la batude dant inizi a lis primis notis dal preludi.
Chê gnot, Giuseppe Verdi  al direzeve la sô prime opare:
“Oberto, Conte di San Bonifacio.”

di Galliano di Buenos Aires
#1***

4 coments On Intun magjic paisut

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît