CorseCurteNovembar#05 – Maravee

#05 – Maravee

Al jere rivât cence che lu ves spietât. Un moment prin il so mont al jere scûr, sierât e penç di cidinôr. Al jere un misteri cemût che al jere lat indevant cun sucès par rivâ propit ta chest moment.
E je stade une piçule flame a impiâ dut. Une robute di nuie, ma braurose e plene di vite. E je stade buine di slargjâsi cuntun sclopâ inspietât che lu veve cjatât impreparât.
Di chel prin bot, mil sfumaduris a son nassudis, cjapant ognidune il so troi. Si jerin sparniçadis simpri di plui, pierdint a voltis la forme origjinâl par cjatâlis plui indevant cuntune vieste divierse ma simpri inmagante. Il mont si varès jemplât e nuie al sarès compagn di prime.
I siei voi a jerin vierts par no pierdisi nancje il plui piçul detai. Sot cheste gnove lûs si scugnive cjalâ dut une altre volte, pensâ prin di fâ. Nol jere usât, si fidave de sô fuarce, de sô prontece di riflès. Ma cumò al veve capît che nol sarès stât mai di bessôl a frontâ il mont e ancje chest pinsîr al jere gnûf.
Cheste novitât nol podeve platâle cun egoisim, dome par se stes. Al jere il prin, e chest nissun jal varès gjavât, ma bielzà dai prins moments al veve capît che si scugnive puartâle in famee. A jerin barufants e famâts, e lu vevin lassât di bande pe sô maniere di jessi, ma a jerin pûr simpri la sô int. Chê robe che ur puartave ju varès mudâts, la sô sperance a jerin i fruts, i plui rissôs ma i plui mulisits. Dut chel dûr lavôr che si nasave tal avignî, al sarès par lôr. E par chest sintiment nol veve ancjemò peraulis.
Maraveât, il prin om che al veve viodût il cricâ dal lengaç al jere pront a puartâlu dapardut.

di ***

#1***

2 coments On CorseCurteNovembar#05 – Maravee

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît