CorseCurteNovembar#03 – Mariute e il so gjelât

#03 – Mariute e il so gjelât

A ogni cricâ dì jê si jevave sù, e simpri cun cetante energjie si plaçave te cusine dal so cafè a lassâ jevâ lis brioches e dopo a metii drenti la marmelade o la creme. E cuindi al jere rivât il moment di preparâ il gjelât, metint in moto il machinari par la mantecazion, il famôs “cattabriga Carpigiani”, che lu faseve vignî fûr cussì biel fresc, cremôs e saurît che al jere un plasê a viodilu. Lu tirave fûr cu la pale di plastiche e lu distribuive cun precision dentri lis vaschetis di açâl e par ultin di front di ognidune i meteve il cartelin de sô cualitât inte vitrine refrigjerade.
E ogni volte jê si sintive une vore sodisfate cuant che e veve finît dut chel lavôr, savint che il so gjelât al jere li, pront e fresc par jessi gustât dai siei clients. E cuant che i disevin: – E ce bon che al è il to gjelât, Mariute! – i si iluminavin i voi di contentece e di sodisfazion, e alore no i pesavin plui lis faturis che e fasev a ogni cricâ dì, parcè che il so lavôr al jere dut ce che i veve restât te vite.
Benedete la mê Mariute!
Ma a la fin e à scugnût ancje jê rassegnâsi al timp che al passe, al cuarp che nol rispuindeve plui come une volte, al so cûr indebulît che al veve tacât a dâ i numars, fasintii capî e acetâ che e varès dovût tignîsi di cont e cirî di polsâ di plui. E cussì ancje par jê e je vegnude la ore di molâ sù dut e gjoldisi la sô pension.
Mi ricuardi che jê mi contave, cun cussì tante nostalgjie che i tremave parfin la vôs, che di cuant che si jere ritirade, a ogni cricâ dì al continuave a sunâi simpri il svearin tal cjâf, par visâle che e jere ore di tirâsi fûr de cove e tacâ daûrman a lavorâ. E jere deventade aromai une robe plui fuarte di jê, e alore dopo e veve imparât a fâsi une biele cogume di cafè, però inte cusine de sô cjasute, e si consolave a cjalâ fûr dal barcon la zornade che e stave par nassi.
Dut chest par fâmi capî che il lavôr nol è dut inte vite e che a son robis ben plui impuartantis che prin o dopo nus tocje tignî di cont.
Al cricâ di ogni zornade cumò ancje jo, magari parcè che la mê gjatute viers chê ore mi tormente par fâi lis cjarecis, o ai començât a cjalâ fûr dal barcon biel che mi prepari il cafè. Però no mancj mai di visâmi di mê mari, che le sint simpri daûr di me a dîmi: – Ti vuei ben, frut!- , simpri pronte a judâmi e a conseâmi, come chê lusute che e art dentri di me e che o dovarès scoltâ di plui. Cumò però o ai ancje imparât a cjalâ lassù plui spes e a domandâ di rivâ a passâ chê zornade miôr pussibil e ancjemò cun tante voie di vivi.

di ***
#1***

1 coments On CorseCurteNovembar#03 – Mariute e il so gjelât

  • Biele le storie di Mariute, tant tacade al so lavôr e al sô cafè cu le impuartance plui grande di no fâ dismentie di cjala il dì, pûr stant dal balcon. Lussian

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît