CorseCurteNovembar#01 – Jê Alba e jo il Scûr

#01 – Jê Alba e jo il Scûr

Alba! Le clami biel planc, che a son benzà ducj a durmî. Le clami par che mi vegni dongje. Alba! I cisichi ancjemò, ma no mi sint.
E cjamine discolce, i pîts dentri inte aghe, che le strafont fin parsore dai zenoi.
I mei braçs si movin viers di jê, tirâts come par tocjâle. Lis mês olmis sul savalon si scancelin par ordin, come se nol ves di restâ segn di me, de mê corse par cjapâle. Capis di ogni misure e colôr e alighis al è dut ce c’al indure su la rive.
Le viôt simpri plui lontane, jenfri lis ondis come cjavai mats, riçots su la spice. Cumò e jê dentri fin tai flancs, la tele dal vistît lizêr tacade intor de piel. Piel slisse, clare come il non che i àn dât.
Alba! I bergheli cheste volte, ma se no à sintût fin cumò, ce sperance aio di fâle zirâ? Nissune, mi ripet, ancje se no rivi a molâ di cjalâle intant che il mâr le glot un pôc a la volte.
Su la çobare dai cjavei clârs al monte un mulinel di aghe, si romp in dîs mil gotis che si sparnicin ator ator. O ai la muse imbombade. Ce fuarce che tu âs, mâr! I berli, cence capî che o soi jo: o stoi vaint, a son lagrimis.
In lontanance, sul fîl de aghe e je une manie dal so vistît. Mi distiri biel lunc par cjapâle sù, ma si disfe dute in fîi colôr di rose.
Il mâr le à glotude, o pensi, daspò ò viôt un rai narancin sbusâ la superficie e daûr di un lamp zâl che si jeve e si slargje, come dêts fûr misure che mi cjapin e mi strenzin. Mi scjafoin!
Alba, Alba! Ce fâstu? I domandi cui voi, che no ai plui flât. Mi sglonfi e mi smamìs, un neri che al devente prin grîs e daspò lilut.
Alba. Cumò nome lu pensi, il so biel non. Un destin di sfortune il nestri. Jo che le spieti, par cjalâle in muse almancul une volte, e jê che e va pe sô strade, fintremai che mi mangje, si ben che no ai dincj.
Il neri di une gnot parât jù intîr, un colôr a la volte. Une muart dolce, dopo dut. Alba… Cul ultin aiar dal Scûr che o soi, i miei lavris e soflin il so non. E al è di gnûf dì.

di ***
#1***