Sabide stade o soi lât a balâ tal borc di Recoleta. Tal breâr o ai cognossût une fantate bielonone, ninine, cui cjavei neris e dute vistude di blanc.
O sin stâts insiemi dute la sere e o vin fevelât une vore. Jê e faseve la mestre e si clamave Ulrike.
Tal cricâ dal dì le ai puartade a cjase sô. Stant che jê e veve frêt i ai prestât il gno maion blu, chel che mi plâs tant.
Cuant che o sin rivâts, Ulrike e je jentrade subit, cuasi che e fos sparide tal zardin, parcè che e veve pôre che so pari le viodès rivâ cussì tart.
Tor misdì mi visai dal gno maion. Jessint che o jeri dongje de sô cjase o soi lât a cirîlu.
O ai sunât il campanel e al jere vignût fûr un om vieli. I ai domandât de fantate. Lui mi à cjalât maraveât e mi à rispundût che sô fie e jere muarte dîs agns indaûr, che e jere tal cimiteri tal stês borc di Recoleta. Mi veve dît ancje dulà e jere la sô tombe.
Jo no volevi crodi. O soi lât tal cimiteri e cheste volte o soi stât jo a restâ maraveât: su la tombe di Ulrike al jere il gno maion blu.
di Augusto Bornancin
#1384
Notis:
La fantate vistude di blanc e je une liende urbane avonde sparniçade. A disin che e je stade une statue tal cimiteri di Recoleta a vê fat nassi la storie. Rufina Cambaceres e jere une fantate aristocratiche, inamorade di Hipolito Yrigoyen, che plui indevant al sarès deventât il president di Argjentine. Ma l‘om al jere l‘amant di sô mari. Ai 31 di Mai di 1902, cuant che e faseve i disenûf agns, e murì di bot e sclop. Ancje se no son provis, a disin che e jere stade sepelide ancjemò vive, ma catalessiche.
Daspò de sô muart, a àn fat une leç di veglâ i muarts par almancul vincjecuatri oris.
