Un regâl dal Ostîr e altris gnovis

Mandi a ducj! O vin pene finît di publicâ lis contis de nestre CorseCurte, rivade aromai a doi tierçs dal percors, e o vin gust di fâ un regâl a ducj chei che a son iscrits ae liste di Contecurte.

Anzit, a dî il vêr al è il vuestri Ostîr che daspò di vê vût la sodisfazion (e o sin za ae cuarte volte) di rivâ te terne finaliste dal Premi Scerbanenco di Lignano Noir, dediât aes contis neris e zalis, al à fate cheste pensade.

Sticât di Somaglino, al à pensât di viodi cemût che e rindarès la conte, scrite par talian ma ambientade come simpri in Friûl, a voltâle par furlan. Da rest, la conte e jere un flus di fevelade uniche, in pratiche un monolic, e al voleve rindi la fevelade di un carabinîr paesan che al cjacarave sì, par talian, ma intun talian semplic, cun influence dal furlan. Insome… la conte e jere za une vore furlane e la traduzion e je stade veloce.

Par cui che al à za let la conte par talian, publicade sul Messagjero, une ocasion par tornâ a leile cu lis modifichis par fâle rindi ancje par furlan. Par ducj chei che a no le àn lete, une ocasion par lei une conte lungje nere furlane e par furlan, scrite cuasi tant che piçul test par teatri, che o ricevês in esclusive. A proposit… Sêso iscrits ae Liste di Contecurte? No? Iscriveitsi daurman! Ve li, a man drete tal sît (o sot sot sul telefonut), meteit la vuestre mail. E se o vês gust di pandi cheste gnove, condivideit chest messaç par tirâ dongje cualchi gnûf iscrit, che al fâs simpri ben ae Osterie.

La conte us rivarâ ca di cualchi dì, di podê scjamâ de vuestre mail.

Simpri restant in teme di concors, us spiin ancje che intai finaliscj dal innomenât Premi Malattia della Vallata, par poesiis in dialet, o vin un altri tocut di Osterie: la nestre coghe Serena Fogolini, che o sperin che e rivi devant di ducj!

E in ultin, no si sin dismenteâts che o vevin di tirâ fûr dai premis par cui che al rivave sul podi de CorseCurte di Vierte, ven a stâi la classifiche dai trê mês Avrîl, Mai e JugnI trê premis a son come par solit trê libris:

  1. I segreti del Tagliamento, di Cristina Noacco, ediciclo editore
  2. Par un pêl, di Riedo Puppo, gnove edizion de SFF cu la poie dal Comun di Murùs
  3. Zâl par furlan, Antologjiche 2016, di AAVV, cu lis contis dal innomenât concors di Spilimberc

O vin bielzà tacât a scrivi a lis trê scuadris che dutcâs a son lis stessis dal campionât di Unvier, il Cjicechepicjedispicjelacite, il Real Cocâl e il Borussia Dordul, ancje se par pôc.

E par cui che al è dentri te corse curte, e ancje par fâ sivilâ lis orelis di cualchidun altri, ve che o vin dât ancje il teme par la CorseCurte di Setembar.

E za che o sin a spiâ gnovis. L’Ostîr al à decidût che al regalarà une conte dal Scerbanenco (chel dal àn passât) ancje ai iscrits ae liste dal so sît personâl… vait lâ e iscriveisi, se le volês.

Nus par avonde… come gnovis. E mandi a ducj!

1 coments On Un regâl dal Ostîr e altris gnovis

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît