CorseCurteAvost#23 – I partîts e i restâts

 

#23 – I partîts e i restâts

Achì e veve di jessi une storie come tantis. Une storie di un paisut scuindût intune piçule valade e tant amât: di chei che cuant che si è fruts a somein dut il mont, e cuant che si à viodût il mont a somein une robe piçule e di pôc. Une storie di cjasis plenis di int e dopo vueidis, di stradis plenis di vôs e dopo cidinis. Di int che e partìs e di int che e reste.
Di int che e va vie e e lasse un toc di cûr sot di un clap cu la sperance di tornâ a cjatâlu un dì, cuant che finalmentri e podarà tornâ tal so paîs. E intant che e je vie pal mont tes citâts, tal forest, si insumie di un avignî plui biel e si consume di nostalgjie, cence visâsi che chel paîs nol esist plui, parcè che intant altris a son lâts vie e se al va ben e je rivade int gnove che lôr no cognossin. Se cualchidun al è rivât. Se no, il cidinôr al devente paron di dut.
Di int che e je restade parcè che chel mût di vivi in fin dai fats ur lave ben cussì, e a sintivin che framieç di chei claps, di chei mûrs, di chei prâts e di chei boscs al jere alc di impuartant che no si podeve pierdi, a cost di fâ di mancul di altris robis plui modernis, plui comudis, plui a la mode. E intant i agns a passavin e ancje par lôr, il paîs al cambiave e nol jere plui il stes.
Se cheste e fos la solite storie di partîts e di restâts, cumò ducj lôr si cjataressin di Astât a contâsi lis flabis di une volte, di un paîs dulà che no puedin plui tornâ, nissun di lôr. E cualchidun al tornarès pardabon, magari par gjoldisi la pension dopo tant lambicâsi. Ancje se i amîs di une volte no son plui, la ostarie e la buteghe a son sieradis e di gjoldi al è restât pôc e nuie.
Ma stant che la storie e je mê, tal paisut o fâs rivâ un tren, un tren magjic che al fâs il zîr dal mont e al va a cjoli ducj chei che a son lâts vie e ju fâs tornâ ducj insiemi, ancje i fîs e i nevôts. E il paîs lu comedin e lu fasin plui biel di prin. E dopo cul tren magjic a van in citât par domandâ ce che i lôr vons no àn mai vût: la scuele, la pueste, il miedi, un lavôr decorôs… e a rivin adore a vêju! Lu crodaressiso, che al esisti un tren cussì?

di ***
#1***

1 coments On CorseCurteAvost#23 – I partîts e i restâts

  • Une conte un grun smirade,je vere che si devente forescj intal propit paîs cu le int gnove che transite par comoditâts di lavôr, e che sta un cert periodi e dopo e migre di gnûf, e le nostalgjie dal vêr paesan ch’ al vîf lontan cu le immagjine dal sô paîs di îr. Lussian

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît