CorseCurteAvost#22 – Paternitâts


#22 – Paternitâts

“Lune, Diu, parchis: cuâl saraial il destin di chestis barcjis? Lune, fâs di chestis ondis scune. Parchis che o viodês la fin, no stait a çoncjâ il nestri destin”.
O vevi inventade cheste naine la gnot prime di tirâ sù la ancure, cence imagjinâ che mi varès compagnât par ducj i amonts di chest viaç cence fin. Une aventure deventade une condane par vê olsât a sburtâsi plui innà di ce che al jere permetût al om.
Cinccent e trentesîs dîs di traviersade, sfidant burascjis, nemîs, malatiis.
E la pôre. La pôre incalmade tune voglade malcuiete, la pôre che e sgarfe intal cerviel sledrosant lis sperancis, la pôre che si innee tun orizont cence limits.
Si pues fintremai nasâlu, il tuf di orôr dai oms che si mude in odi. Odi viers il lôr cjapitani. Jo. Jo che mi soi incragnît suntun sium e che forsit o paiarai cheste bausie cu lis nestris vitis. La mê e lis lôr.
Galiots, ligjeris, sassins. Oms cence dius e cence parons, che in tiereferme a mertaressin dome la forcje.
I unics a lassâsi tirâ dentri di cheste imprese cuintri nature. Ma ancje i unics in stât di rivâ insom.
La veretât e je che plui ju cjali, plui mi rint cont che a son la mê famee. La vite di ognidun di lôr mi è plui cjare di tancj amîs di un timp, e se o sieri i voi no je la muse di vuestre mari a palesâsi tal sium, ma la lôr.
La brame di scuvierzi e je stade plui fuarte di voaltris, fruts, ancje di te, Carlos, che tu jeris inmò tal grim. O ai spesseât a partî, ben savint che us varès lassâts vuarfins. No sai se o tornarai indaûr, ma o speri che leint chestis letaris o podedis capî: ce che o ai fat, lu ai fat par voaltris, no par me. Par che o podedis svolâ libars su lis alis de sience, e no incjadenâts ai clostris de religjon. Par che no restedis scaturîts dal scûr che al rive daspò dal amont, ma si inzegnedis a scuvierzi ce che us spiete inte lûs.
Se mai o rivarai insom di chest viaç, tignîtlu ad aments: jo o soi il fi dal mont che al è stât, ma o sarai il pari dal mont a vignî.
Us vuei ben

Fernão

di ***
#1***

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît