As di briscule

Tornât in Canadà, Clark al podeve viodi di persone il faliment de sô mission.
“I americans a vuelin jessi sigûrs che dal CF-105 a nol restedi nancje un bulon!” i fâs il so sorestant, intant che, denant di lôr, i prototips dal avion a vegnin dismantelâts.
“I progjets?”
“Dut secont i ordins.” i rispuint Clark ancjemò stiçât par come che e je lade a finî la sô mission.
“Benissim” al rispuint chel.
“Ma cumò, cun ce che a si pararìn dai bombardîrs dai Rus?”
“I americans a vuelin dânus i F-101 e i F-104.”
“A rivino a mach 2?”
“Nuie mach 2, massime 1,8.”
“Lis siorutis che a son vignudis cun me mi àn contât che i rus a stan fasint bombardîrs da mach 2 come il B-58 dai americans.”
“A vuelin dânus ancje i AIR-2 Genie a testade nucleâr di meti su i F-101”
“Tant par cambiâ, i americans a risolvin dut cuntune bombe atomiche … un bombardîr rus al passe il confin e i nestris a varessin dome di tirâi une bombe atomiche par fermâlu, ben metûts o sin!”
“Sì, o sin verementri ben metûts, pense che o vin parfin pierdût un pôcs di tocs dai prototips e nissun a ju à segnalâts, pense, avonde tocs par fâ su un avion complet …”
Clark a si volte di colp.
“Purtrop o no puedin clamâ nissun dai nestris pilots, a podaressin jessi pedinâts, a nus covente int che e vedi gust a stâ ben platade.”
“O vêso cualchi idee?”
“Lis sôs amîs russis, ce che ti parin?”
“A son cetant competentis e o soi plui che sigûr che a no àn nissune voie di tornâ in Russie.”
“Alore dîi che o vin cjatât une biele cjasute dulà che a puedin là a stâ.”
Daspò pôc timp, intune gnot cence stelis, Clark al puarte Julia e Sasha dentri intun hangar dirocât dal aeropuart di Toronto. Une volte jentrâts a si cjatin dut un altri ambient, cetant plui net, ma soredut par chel che al jere dentri.
Par lis zovinis al jere alc come jentrâ intun vecjo cjistiel e scuvierzi che e je la tane di un antîc dragon che al si crodeve muart di cetant timp. Sasha e capìs subit: “No tu volarâs mighe che …”
“Esat, e no dome jo ma cetante int …”
Subit dopo il dragon a si dismôf, rombant e sflamiant al partìs viers di une base segrete pierdude in tal dentri dal paîs.

di Luche Bagnarol
#1***

1 coments On As di briscule

  • E pensâ che cui bêçs di ducj i armaments vie pal mont , si podarès vivi ben ducj, lavorant le mitât di vot ores in dì, e cun plui spirit di fradelance. Lussian

Lasse une rispueste a Anonim Cancele rispueste

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît