CorseCurteAvost#18 – Amont blu

#18 – Amont blu

Roane e jere platade, cul fusîl in man, e daûr di jê cuatrimil soldâts al so comant. Il ploton numar 4 al jere fat di oms, feminis, fantacins e fantacinis, e vielis. Aromai si jerin zontâts ai “Cence Patrie” ducj chei che a jerin restâts.
I plui zovins a trimavin di frêt e di pôre, un pâr di vielis a riduçavin par slontanâ la tension, Roane no moveve un muscul, e jere concentrade a cjalâ il soreli ch’al lave jù e cuasi no bateve lis palpieris; no voleve pierdisi nancje un fregul di moment di chel che al varès podût jessi l’ultin amont de sô vite.
Roane e spietave l’Amont Blu; al jere chel il segnâl par partî, par sfogâ dute la rabie montade sù tai ultins vot agns di dominazion dal “Cuarp Di Açâl”, il grup rivoluzionari che al veve butât jù la ditature di Nerie par dâ la Patrie in past a une ancjemò piês. Al podê cumò al jere Icar, che al veve in pôcs agns mandât miârs di personis tes coloniis di lavôr, che al veve istituît lis tessaris di acès ai “Centris De Mangjative” par i “Citadins Fedêi” che nô o clamavin i “Citadins Sotans”, intant che nô o scugnivin cumbinâ di mangjâ tal marcjât neri là che il pan, tai ultins mês, ti lu compravis cul companatic, ven a stâi fusîi, pistolis, curtìs e granadis.
Il soreli aromai al jere sparît tal orizont e si spietave dome l’Amont Blu. Cun at che il prin ploton al sarès jentrât a Narmisor al varès fat saltâ par aiar i depuesits di “Fûc Licuit” e l’esplosion e varès creât l’efiet dal amont blu. La devastazion e la mancjance di preparazion al event dai oms di Icar a varessin lassât il timp a chei altris plotons di rivâ in citât e cjapâ il “Palaç Di Açâl” e finalmentri cjapâ il podê.
Velu… il cîl al tache a piturâsi… al é il moment.
Roane e vose cemût che no veve mai fat in vite sô e a jê si zontin i cuatrimil par une ultime esplosion di fuarce prin de vitorie o prin de muart.
Roane e vuide i ribei viers Narmisor e tal so cjâf e à dome la voie di copâ Icar, une volte par simpri, so pari.

di ***
#1***

2 coments On CorseCurteAvost#18 – Amont blu

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît