CorseCurteLui#05 – Cuarte frontiere

#05 – Cuarte Frontiere

A Palme, Puarte Aquilee e veve in prin di clamâsi Puarte Maritime, parcè che e veve di vê un canâl che le colegàs cul mâr par vie dal puart di Çarvignan.
Zuan al jere cun Gjonde e Marte su la dighe di Grau a viodi il spetacul des ondis dal mâr che a sbatevin cuintri lis pieris.
“Somee di jessi intun altri mont, cetant lontan, invezit o sin dome a pôcs minûts di Palme.” al fâs Zuan, amirât dal panorame.
“Ti somee di jessi in tiere foreste parcè che in Friûl o tindìn a pensâ di plui ae tiere ma, se nol fos stât chest mâr no sarês stade nancje Aquilee o, almancul, no sarès stade come che le vin cognossude.”
Gjonde e pâr savê alc plui di chel che e conte, dopo e tache Marte: “Il Friûl al è un puint tra i talians, i sclâfs e i todescs ma, soredut, tra il centri dal continent e il Mediterani, par chest la frontiere sul mâr e je plui impuartante di chês altris trê.”
“… e par chest in tancj inte storie a àn volût concuistâlu ma il Friûl al è cetant leât ae aghe: de mont, passânt par i flums e lis rois che bagnin citâts e paîs, fin a lis risultivis da la basse, fin al mâr, chi denant di noaltris.” E continue a spiegâi Gjonde.
“Mi steit disint che, come la aghe, il Friûl no si po sierâ par simpri, prime o dopo al ven fûr…”
“Come une risultive: inte storie al è stât cui che al à capît le sô ricjece, ma son ancje stâts di altris che no volevin capîle parcè che a erin masse impegnâts a fâ i pipinots di chei che a ju mandavin achì e par chest si sfuarçavin a sierâ le ole, parcè che no rivavin a controlâle.”
“Cuant che a rivin chescj tocje fâ come cun l’orcolat: lassâ che al passi e dopo tornâ a meti dut a puest: dulà che al ere, cemût che al ere.” e si zonte Marte.
Zuan al tâs, alore Gjonde i fâs: “Dinus, Zuan, sâstu cui che a son lis aganis?”
“No son lis striis che a vivin in tes aghis e… in tes risultivis?!”
“O forsit, ancjemò miôr, chês che a lis custodissin…” i fâs Marte.
“Lis custodis da lis risultivis… “
Zuan al reste a rifleti su lis peraulis des sôs amîs cjalant la aghe dal mâr che, cumò, no je plui cetant foreste ma leade ae sô tiere ben plui di chel che al crodeve.

di ***
#1***

2 coments On CorseCurteLui#05 – Cuarte frontiere

Lasse une rispueste a Anonim Cancele rispueste

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît