CorseCurteJugn#07 – Viaç di un dì

#07 – Viaç di un dì

Orlant al scuvierzè la orloiarie che al soreviveve intun puestut impussibil, a mieç di une strade taiade par la stazion dai trens.
La vetrine e ospitave uns pôcs di orlois antîcs ducj cuvierts di polvar, propit come lis scansiis. Intun cjanton un scuancassât cartel di ceramiche al declarave tra virgulutis:
“Cun avonde timp dut a si dismentee”
Orlant al veve pene finît di lei il cartel cuant che al scoltà une vôs daûr de schene:
– E je ancje une trapule.
Il vecjo al jere cjamât di orlois: di sachete picjâts al cuel, di pols tai braçs e cronometris incolâts intune vecje barete impirade fin tes cees.
– Prime volte par chi, ise vere?
Orlant al fasè di sì cul cjâf, al de il bundì e al le indenant viers la stazion. Nol voleve rivâ tart il prin dì dal so gnûf lavôr.
Chê stesse sere al tornave di presse scjampant dal frêt cuant che alc te vetrine lu fermà.
Il cartel al veve cumò un altri test:
“Il timp al è une trapule”.
– E mai o savarìn se o sin dentri o fûr.
Une altre volte la vôs daûr de schene. La muse dal vecjo e veve une smorfie mareose e une voglade fisse.
Orlant al le diret ae sô machine. Il vecjo in distance al alçà la man mostrant cuatri dêts.
Il dì al someave sfantâsi intune fumate. Al ve il sens che in chel puest nome il vecjo e lui a fossi reâi.
Cartei vieris cun diviersis tescj intune vetrine antighe. Buine idee par un marketing vintage, al pensà Orlant.
La frase no veve sens.
O soi intun sium! – si dîsè- Chel al spiegave dut! Il vecjo orloiâr, il cartel di peraulis mudadis, il fat di no ricuardâ nuie dal dì, che al jere come nereôs. Al jere un sium e al bastave dome sveâsi. Nuie di plui.
Un frêt crût al scomençà a alçâsi dai pîts.  Il scûr al tacà a cressi dulintor.
– Siore – al disè il responsabil de terapie intensive – za no je ativitât cerebrâl. Lino a discolegâ. `
A lis cuatri p.m. il timp di Orlant Canciani al tornâ al nuie. Il vaî de sô femine al restà platât par vie dal tren, che al passave a pôcs metris dal ospedâl.

di ***
#1***

1 coments On CorseCurteJugn#07 – Viaç di un dì

Lasse une rispueste a Anonim Cancele rispueste

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît