CorseCurteMai#18 – La strade

#17 – La strade

Cheste conte no sarès mai stade scrite se Mineto Bertòs nol fos rivât a matine cuntune cjadene ta man.
Cun dute probabilitât, no sarès mai stade scrite nancje se Ulrico Bertòs, impresari edîl di une cierte impuartance, nol ves puartade la pacare dongje de cjase.
Ma di sigure, cheste conte no sarès mai stade scrite se un Sindic pôc prevident, nol ves aprovât un progjet par une gnove strade, biele, largje, asfaltade, che e varès puartât a Udin intun marilamp. Po dopo, nol interessave se intal paîs e jerin a stâ dome trente animis, e une machine a passave une volte al mês.
Il plan al proviodeve di sdrumâ la cjase dai Faris, nomenade famee dal paîs, che no veve vût nissun erede. O miôr. Doi eredis a jerin, ma no vevin puartât indenant il mistîr dai vons.
I doi eredis, di cognon a fasevin Bertòs. Doi fradis. Si, propit chei de conte.
— Va vie, Mineto, moviti! — Al vosave Ulrico da cabine, pontant la pacare in face a so fradi.
— Smonte e parimi vie, se tu âs un fregul di coragjo! — Al rispuindeve Mineto, che si jere incjadenât a une bertuele di une puarte.
Ulrico al veve studât la pacare e al jere smontât rabiôs in bestie. Al jere rivât dongje so fradi fintremai che i doi nâs cuasi si tocjavin.
— La strade e covente plui de cjase! Aromai il stabil al cole a tocs! — Al veve vosât cun autoritât.
— Par fâ passâ cui? Il mus di Berton, o pûr la machine da fie di Malie une volte al mês?
Intant Martin, un frut di dîs agns che al passave in biciclete si jere fermât e al veve cjapât sù un dissen colât da cabine dal scavadôr. Si jere svicinât a Ulrico. L’om lu veve subit smicjât par traviers.
— Ninin, tu stâs cjalant il dissen denant daûr!
E cussì la strade e jere stade fate cence butâ jù la cjase dai Faris. Se cualchi inzegnîr al fos vignût a controlâ si sarès inacuart che il dissen dal progjet nol jere tant clâr e l’impresari lu veve zirât sot sore. La strade e jere stade fate plui a diestre, sparagnant il stabil e fasint fâ la pâs a doi fradis.
Eco alore, parcè che cheste storie e veve di jessi scrite.

di Massim Furlan (Sbreghebalon)
#1276