CorseCurteJugn#01 – Tresinte

#01 – Tresinte

Dino, Toni, Lise e Catine, doi fradis e dôs sûrs, in cuatri a zuiâ dut il dopodimisdì su la place. Dino al à plui agns di ducj, undis; daspò a ven Catine, dîs e mieç; Lise e Toni, nûf.
Al è cuasi un mês che a zuin a cui ch’al sa plui robis. A cui ch’al è plui grant, in altris peraulis. A passin lis oris sentâts devant de ostarie di Sbirulin e a contin une daûr chê altre, dutis robis di no crodi, intant che a fasin mirinde.
“Nestri pari al à dite che a son machinis ch’a corin fin 300 a l’ore. E no dome tal circuit di Imola!” al berle Toni.
“Ma va là, mone. 300 a l’ore, no tu sâs nancje trops ch’a son! E ce machinis varessino mai di sedi?” i rispuint Dino. Lu pice tal braç, li ch’al è grassut e fof, ma i reste istès une biele brucje blu.
“AHI! Stupidat, ce fâstu!” La vôs di Toni e ven fûr come chê di un gjat rabiôs.
“Nestre mari nus a dite che i frutins piçui a caghin zâl e mol,” e salte sù Lise. Catine le cjale e le lasse finî. “Cuant che a tetin,” e zonte Lise e daspò si plate daûr di sô sûr.
Dino e Toni a tachin a ridi, si tegnin la panze, a pivetin a fuarce di sustâ.
“Propit cjastrons… ce crodêso? Di no vêle fate zale ancje vualtris doi?” ur dîs Catine.
A ridin ancjemò, slungjant la man inte raine che a àn puartât di cjase. Vuê cjariesis.
Une vuacade e une cjariese. A van indenant par un pôc, intant che lis dôs sûrs si cisichin intes orelis. Cuant ch’a fasin par cjoli une cjariese, si acuarzin che no ‘nd è plui. “Ma insome, lis vis mangjadis dutis!” Dino e Toni si ribaltin a ridi e chi e là si sintin rumôrs di pêt.
“Mi pâr che no us àn fat tant ben…” i sbrisse fûr a Lise, che e riduce.
Dino al tache a lamentâsi. “Ohi ohi, ce mâl,” al dîs tignintsi la panze. “O scugni cori a cjase…”
“Ancje jo, ancje jo!” Toni i va daûr e intun lamp no son plui.
“Sperin che a rivin in timp!” Cumò a son lis frutis a ridi. “Dîstu che la fasin zale ancje lôr?” e domande Catine.
“Cuissà? Di sigûr le fasin intor se non van a 300 a l’ore!” e rispuint Lise cuntune biele ridade.

di ***
#1***

3 coments On CorseCurteJugn#01 – Tresinte

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît