Intune cjase amie o viodei un confessionari, mi diserin di vêlu cuistât intune buteghe di antichitâts. Al jere ancjemò in gjambe, tirât a lustri, cu la sô biele tendinute colôr pinitince. E ca mi disei; dome Diu al savarà cetancj pecjadôrs che a pleiarin i zenoi su chel scagnel, denant di chê gridele, contantji i pecjâts a traviers di chês busutis, liberantsi dal pes de colpe che ju sotanave.
A ’nt varà sintudis di ogni pêl e colôr, cualchidun ancje meretantsi come pinitince di pelegrinâ a pît al Santuari di Madone di Mont, altris se varan suiade cun cualchi pater ave glorie. In tancj agns al veve assistût ai cambiaments de societât, dai pecjâts, de morâl e ancje des pinitincis. Chel che une volte al vignive considerât pecjât mortâl, vuê al è viodût come veniâl e chel che une volte si cirive di scuindilu il plui pussibil, al ven spampanât sul Facebook e altris sociâi. In dì di vuê nissun al crôt plui aes flamis dal Infier.
Mi domandavi, lu varano mandât in pension?, o saraial stât lui a volê ritirâsi?, dantjur come scuse la sô avanzade etât, o forsit, strac di tantis debilecis umanis e murmuiaments inutii. Une dì al disè baste, i vevin metût propit in face un altri confessionari, al someave un chiosc, un paveon, lis parets di veri a permetevin di cucâ dentri, in comun a vevin dome une crôs picjade, dut il rest al someave un ufici cun ducj i soi argagns modernis: telefon, notebook e parfin un ventiladôr. Il sorestant di cheste “butegute” al jere un predi zovin cence tonie.
Cussì al vignì a savê che i fedêi a podevin confessâsi “on-line”.
Nol podè stratignîsi, e cjalânt viers il Crist che al dominave l’altâr maiôr i disè: – Signôr, li co sin rivâts, dulà larino a finîle? – Daspò di un lunc cidinôr si sintì une gruesse vôs paterne che e amonive cuntune ande solene: – Ma, dome Diu lu sa!! –
Di lì indevant la glesie si le spopolantsi, lui al veve une sglonfe e al passave lis zornadis sossedant, ancje chês vecjutis che un timp lu visitavin contantji de lôr solitudin lu vevin lassât. Invezit tal chiosc di face si viodeve une vore di ativitât, il zovin predi al jere saldo a scrivi, a cjacarâ par telefon e a dâ fûr benedizions.
E cussì il nestri vecjo confessionari al pensà: – Ce di miôr che cualchidun mi puarti a cjase sô e mi tegni cont, prin che i carûi mi fasin fûr.
di Galliano di Bueno Aires
#1257
2 comments On Il confessionari
Grant Galiano cul sô confesionari,bielissime conte che jo le definis realtât, stant cui timps che corin. Une conte ricje di essence, e cun di plui cussi ben metude intal scrit di lenghe nestre, sedial come perulis e verbalizzazions che al è dut ce imparà. Crodimi Galiano jo o ai miorât il gno furlan leint i tiei scrits. Un salût cun compliments di fier a un furlan che dopo tancj agns al estero nol mole il sô Friûl . LUSSIAN
O vin ancjemò il confessionari tant che i à viodût l‘autôr. Ce grant plasè di vêlu intune conte dal nestri cjâr mestri…