CorseCurteMai#11 – Ce che al reste

#11 – Ce che al reste

Une altre dì che al si alçave cu la domande: Lassarèssial la cjase?

Cheste cjase plene di vôs che a jerin passadis, e di memoriis che a rondolavin dì e gnot par lis stanziis vueidis.

Mûrs, mobilie e imprescj traviersâts di rivocs profonts, cussì profonts che no i permetevin di bandonâle.

Odôrs, cjantons, emozions. Segns di dute une famee che cumò a apartignivin ancje a lui.

Al veve presint il so ricuart plui vieri, cuant che al jere un frutin alçât pai braçs da so pari in cheste midiesime cusine fin ta la altece da la uniche, prime e nude lampadine pendolant dal tet.

Prime al è restât vueit il paîs, daspò lis stradis (cualchidune ancjemò cun smavidis bandierutis restadis de ultime sagre), daspò la cjase.

Un riduç amâr al saltâ fûr.

E je vere, la cjase cumò e podeve ancje jessi un tramai. Za nol veve plui fame che lu visitàs intal fin di setemane. E nancje fîs cun avonde timp. I pôcs amîs vîfs a jerin lontan, in ricovars inte citât, o intal miôr dai câs intun piçul apartament a pocje distance da la famee e dal ospedâl.

A si alçà e cjadree e al cjalà dal barcon viers il curtîl. Di bot e sclop lu cjapà l’odôr di umit. Al calumà il tet alt di breis fraidis. Salacor al dovarès di considerâ la propueste di chê piçule stanzie intal apartament di so fi fin che nol ves cjatât alc di fitâ.

Al si comedà la siarpe e al viodè il so flât condensâsi devant de muse. Al preparà un altri cafè te vecje stue a lens.

Intant che al gustave al puartà la sô voglade tal font, dulà che il vieri cjariesâr si ustinave a florî un altri an. Al jere plen di gotis di rosade che a slusivin al soreli.

Al le fûr di cjase e si sentà tal marcjepît di fase. Il soreli al inluminave la façade smavide. Par un moment la imagjinà slusinte come in tai siei miôr timps.

L’aiar cumò al jere plui clip e cualchi jerbe e molave fûr siei aromis al jevâsi il soreli. Une matine compagne a chês altris, cuant che i siei fîs a partivin a scuele.

Al decidè di jentrâ e scovâ un pôc.

Doman e je domenie, magari cheste volte cualchidun al vignarà.

di ***
#12**

2 coments On CorseCurteMai#11 – Ce che al reste

Lasse une rispueste a Anonim Cancele rispueste

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît