CorseCurteAvrîl#20 – No respiri

#20 – No respiri

No respiri. Mi soi sveât chi. Dulà soio? Sierât intun spazi cussì stret che no mi lasse aiar. Al è fof. Coton? No, e je plui come sede. Ma no môf plui nuie. I braçs. No rivi a tirâju sù. Fasêtmi vignî fûr, par l’amôr di Diu! Nol è tant il flât ch’al mancje a devastâmi, ma plui il no podê fâ nancje un moviment ch’al sedi un.

Scûr. No propit scûr scûr. Une sfese di indulà che al rive lusôr e je. Lusôr par mût di dî. Just une olme di cjandele o di fulminant lontan lontan. O rivi sì e no a viodi il colôr di cheste preson. Blanc. Forsit. Sì, blanc. Cemût podie il blanc jessi cussì scûr? Ma chel busut, chê flamute, e je la sole mê sperance. Ve che cun fadie si slargje. Tante fadie. Masse fadie. Valie la pene? Provin! Un ultin sfuarç!

Ve ca ch’al si slargje ancjemò. Passial il gno cuarp? Al somearès di sì. Un braç al è fûr. Ancje il cjâf. Soreli. No jere une flame. Al jere il soreli. O speri di jessi suntun arbul; suntune fuee. Ben, no soi masse lontan. Biadelore! O soi dut fûr.

Ce sensazion strambe. No mi sint plui me, tant che prime di chê preson. O soi plui sec. Ce fam. Une fuee par plasê. E chês chi? Ce sono? Alis? Alis? Pardabon? Alis? Ce dal diaul mi fasio di doi pârs di alis? No mi tocjaraie mighe svolâ? No, no, no. La sensazion di no jessi plui une ruie e je devastante. E po… alis blu e rossis? E chest ros cussì fuart. Ce fastidi. No mi plâs. No mi plâs. La mê vite e jere perfete. Une ruie che no veve di fâ altri che mangjâ e ingrassâ. Ma ce isal di miôr? Cumò mi tocje la pinitince di jessi pavee par simpri. E svolâ. Isal cjastì piês di chest? Ma o ai di vivi. O ai di scomençâ a sbati lis alis. Anin a rosis, anin a lavorâ. Ce pâr di coions!

1 coments On CorseCurteAvrîl#20 – No respiri

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît