CorseCurte – La classifiche di Avrîl

E o sin ai 16 dal mês di Mai e lu savìn ben che o sês là di fûr a spietâ! Ce robe? Ma clare! La classifiche de CorseCurte di Avrîl! E ancje se chest mês l’Ostîr al à vût cualchi cefâ e nol è stât masse presint a stâi daûr a lis robis, la classifiche e rive puntuâl.

Il teme, us visin, al jere bestiis, e une prime considerazion che si pues fâ e je che o vin une vision une vore antropocentriche des robis, stant che pocjissin a àn disfrutât il teme par fevelâ di… bestiis. Di spes, in efiets, si è doprât il concet di bestie in sens metaforic e la bestie al è deventât l’om, o pûr la bestie e jere un mostri o cualchi creature. Ma no par chest, lis contis a son stadis similis, e anzit, si è viodude une grande varietât di storiis, tant al è vêr che pe prime volte la zurie tecniche e je stade in acuardi perfet su la prime conte, ma sui judizis che a vignivin daûr lis ideis e i gradiments a si son sparniçâts une vore.

Ma vonde cjacaris, e tachìn subit a mostrâus la classifiche dal Mês di Avrîl, che e je ancje la prime zornade dal turni di Vierte, che a dî il vêr si è viert come che si è sierât l’Invier.

Eh, sì, parcè che il Cjicechepicjedispicjelacite, fresc di titul di Unvier, al à vierzude la stagjon cence tante creance, cuintri dai aversaris, cuntune conte plene di Creance. No si fevele di une bestie, ancje se si fevele di une colombe, ma intune conte fate di particolârs si met in mostre la nature dal uman e lis relativitâts des nestris azions. Un gran biel toc, che al fâs pensâ a ce che o sin e a ce che o deventìn.

Ma se il prin puest al è lât chi, i inseguidôrs a si son dividûts i favôrs de zurie e ancje dal public. Il Reâl Cocâl, infati, cu la sô conte di ribaltament in prime persone, No respiri, al à concuistât i 5 ponts dal public, e si è metût denant di pôc dal Borussia Dordul, cu la conte L’om ostrighe, di pirandeliane ispirazion, e dal Volketitrai Liga, cu la sô Valentine, storie di une vacje cence pêi su la lenghe. E un biel colp lu à fat il Copasse Blu, cuntune conte mareose e poetiche, e il Lupusinfabula, cuntune storie bibliche che nus impie une lûs diferente des robis. Il cidin ch’al tache e Intal zardin a son juste juste a schene de zone Champions.

Ma no je finide chi. Une biele gnove e je che o vin vût une gnove iscrizion che si è subite tirade sù inte classifiche e si candide a bielis prestazions inte gare di Vierte. Un Dilentant in sbandament, sigure, cussì si clame la scuadre, ma inte conte Bestiis a Palme nol somee inespert.

Po dopo, ce dî? Che tantis contis a àn cjapât il savôr de vuere che si scombat in Europe in chescj mês e lu àn cjapât in maniere une vore poetiche. Migrazion, Uciei (une conte a fumuts!) e Nexus a son ducj esemplis di cemût che il teme des bestiis al à tirât dentri il mâl dal om. E o vin ancje cui che, in pûr spirt de corse curte, al à pensât di seguî il sô gust personâl, cence curâsi de classifiche. Come il Potonzio, che aromai nus mande simpri contis in forme di poesie, ancje se al sa che al rive insom de classifiche (ma cjapant 1 pont dal public!) o pûr il Fi di Marie dal Cafè, che al mande une conte lungje il dopli de misure e nol à fastidis se al cjape 20 ponts di penalitât. E al è propite chest il spirt… contâ storiis, che cheste no je une gare, ma un zûc.

E il FantaCorseCurte? Achì pûrtrop o vin viodût une diminuzion de int che e lei e vote lis contis, ma chei che a judichin a van indevant a vê bon voli. Lussian, il leader de classifiche, al à di stât atent, parcè che la classifiche e je curtissime e a son in 4 a coris daûr par cjapâ la spice. Velu chi l’ordin alore:

E si rive ae classifiche gjenerâl, e tocje dî che il mês di Avrîl al è stât un turni che al à puartât sorpresis soredut a mieze classifiche, plui che adalt. Lis primis 4 scuadris si son confermadis e aromai a paronin la zona Champions. Cjicechepicjedispicjelacite, Reâl Cocâl, Borussia Dordul, ma il Volketritrai-Liga e il Sbreghebalon a àn fat un biel salt indenant, insieme cul Copasse Blu, che al à profitât dai pas fals di Atletic Gjatui, Sporting Brugnul e Barba Pisul Stentadizza. Intal mieç de classifiche, Tapioca City, Vecjo claes e Lupusinfabula a àn tornât a masanâ ponts cu la lôr costance, e de posizion numar 8 ae 14 al è dut un grant barufon, cundut che cumò i ponts a disposion a son potenzialmentri 29. Ancje parcè che il Cuelalt, che al pareve discomparît dilunc dal Invier, al è jentrât in gare e al à za tacât a lâ di rive sù. E cun di plui o vin viodût ancje altris strategjiis di zûc, come la conte a fumuts, che e à paiât dome un toc, o la conte lungje, che invezit no à sodisfat.

benon… nus pâr vonde, par chest mês di Avrîl. Lis contis par il mês di Mai a àn bielzà tacât a rivâ e ca di pôc tacarin a viodilis… La Corse Curte e va indenant, e si stês divertint… invidait int, che il titul di Vierte al è inmò dut in zûc!

1 coments On CorseCurte – La classifiche di Avrîl

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît