Il câs de mascarute insanganade

Al jere scuasi un cuart di ore che il Comissari Rocheton al veve i voi pontâts suntune mascarute, cjatade par câs fûr da ostarie.
Doi oms lu cjalavin spietant la sô sentence: l’Ostîr di une bande e Spilot di chê altre.
Rocheton al veve alçât il cjâf.
—  Cualchidun le à viodude brute e no si pues escludi che al sedi stât copât!
—  No volarès dî, Comissari — al veve sbrufât Spilot, — ma secont me e je dome une mascarute. Cumò si cjatin dapardut. Salacor cualchidun le varà pierdude.
—  Aromai tu varessis di cognossi cemût che si fasin lis indagazions, Spilot! —  Al veve dât cuintri Rocheton. — La mascarute e je insanganade e e à trê indizis: e je pleade, insanganade e sporcje di…
— Di svuirç! — A vevin dit dutun l’Ostîr e Spilot.
— Brâfs! — Il Comissari si jere complasût. — Cumò us conti cemût che e je lade.
— Cheste mascarute e je di un om disperât che al à rot la machine. Intant che al cîr di comedâle cemût che al po, al rive il sassin. L’om si spaurìs e al cîr di gjavâsi la mascarute par vosâ, ma il sassin lu pache in plene muse. Eco il sporc di svuirç e di sanc. Ma l’om al rive a scjampâ. Al plee la mascarute e la met inte sachete par tirâ flât miôr e rivâ a mocâle vie.
— Ce storie ingropade, Comissari. E se invezit il paron da mascarute, al fos un che al lavore intune oficine, la ves pleade e metude inte sachete, sporcjantle di svuirç?
— E il sanc? — Rocheton al veve ribatût.
Juste in chel al jere jentrât inte ostarie Toni Valvule, il mecanic.
— Ostîr, âstu par câs cjatât une mascarute di fûr? No le cjati plui. Vuê di matine fasintmi la barbe mi soi taiât, e cuant che prin di misdì o soi vignût a bevi un tai, le ai pleade par metile inte sachete. Mi soi inacuart che la vevi sporcjade di sanc. Sâstu, une mascarute cussì… No volarès che cualchidun al pensedi che al fos sucedût alc.
—  Spilot… —  al veve dit Rocheton. —  Eco disberdeât il câs de mascarute insanganade.

di Massim Furlan
#1231

2 coments On Il câs de mascarute insanganade

Lasse une rispueste a Anonim Cancele rispueste

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît