CorseCurteAvrîl#07 – Intal Zardin

#07 – Intal Zardin

Lis bestiis a stavin dutis benon inta chel grant zardin. Grandonon. Si le gjoldevin ogni dì, dut il dì. Ogni sere dutis sot di un grant arbul a tabaiâ, a contâsile, a cjantâ e balâ. Dutis lis bestiis, propit dutis. E a stavin cussì ben insieme che no vevin nancje bisugne di clamâsi cuntun non. A jerin bestiis e vonde. E se e rivave une bestie gnove e jere ancje chê la benvignude. Dome il sarpint al veve un non, dome lui. E al stave simpri su lis sôs, in bande. Al si rimpinave su lis ramacis di un miluçâr e al cjalave lis bestiis. – Parcè no venstu jù cun noaltris? Parcè no dîstu mai nuie? Nol rispuindeve nancje. Dome une volte a vevin sintude la sô vôs, une sole. Al veve dit: – No ai nuie ce dî. Mi plâs scoltâus. Propit cussì: dut il so ben al jere chel di scoltâ lis peraulis des bestiis. Ma la bestie gnove che e rivà une dì, eh ben! Chê propit no si le spietavin, une bestie di chê fate. Un nemâl che al butà in fas dute chê armonie. Al veve intorsi une creste fumarie che nissun sa, nol saludave, al si pavonave, al veve une di chês pucis sot dal nâs, come se al fos lui il paron dal zardin. E cun di fat velu lui paron, cence domandâ nuie a nissun. Al tacà a dâ i nons a lis bestiis, a gjavâur vie la peraule, che dome lui al veve di podê fevelâ. Il sarpint al cjalave. Nuie plui cjantosis di nemâi la sere, la peraule des bestiis e deventà un berli, une ronade, un barît, un piulâ, un cuacâ. Dome la bestie gnove e fevelave, il nemâl gnûf, Adam. Cu la sô femine Eve. A vevin secuestrade la peraule, le vevin robade, e jere deventade une propietât lôr e dome lôr. A jerin lôr i parons di dut il zardin. Di dut il mont. E di dutis lis peraulis. Il sarpint nol veve plui il ben di scoltâ lis peraulis des cjantosis dai nemâi che tant a i plasevin. Di stant su lis ramacis dal miluçâr, ju cjalave di brut, chei doi ludros bastarts! – Cumò us met ben jo a puest, voaltris doi, us doi ben jo la buine mandule, sanganon!

di Laurin Zuan Nardin (Lupusinfabula)
#1238