CorseCurte#15 – Il Mostri

#15 – Il Mostri

— Lu vin cjapât. Cumò il paîs al podarà stâ cuiet!
Poiât il telefon, l’om al veve riduçât, sodisfat. Ma voltantsi, si jere inacuart che il frut lu cjalave. Miscliç di rabie e lagrimis.
Nancje il sunsûr di une peraule nol veve rivât a dî il pari. Il zovin al jere corût vie lassant la puarte di cjase spalancade. Nol coventave lâ a cirîlu par sclarî la cuistion. Nol varès cambiât il so pinsîr.
Al jere passât un pôc di timp, di cuant che il gjalinâr di Bete al jere stât sdrumât, lassant ator un pastiel di sanc e plumis.
I vecjos cjaçadôrs a vevin subit sentenziât.
— No pues jessi stade une bolp. E nancje une bilite plene di fam. Di sigure e je une besteate bocone, malnassude e une vore pericolose. Un Mostri!
Intal imprin, la discussion e someave serie, ma in curt si jere sfantade, salacor dopo cualchi zîr di tais e cuntun grum di blestemis.
Dut al jere tornât a impiâsi un mês dopo, cuant che la stesse fin le veve fate il pulinâr di Margarite. Di ben che a veve dome dôs clocjis vecjis e malsestadis.
La int si jere di gnûf invelegnade. I oms a vevin organizât lis scuadris par une partide di cjace cussì di brincâ il Mostri.
Fintremai che la besteate e jere stade cjapade.
Une sorte di tramai, fat di cuardis e raclis, nol veve lassât nissune pussibilitât di salvament. Dopo vêle feride e pestade, la bestie e jere stade sierade intune gabie di fier, pronte pe esecuzion l’indoman di matine.
Intant, inte ostarie si faseve fieste.
Pôc distant dal lûc, un ciulâ di cancars al rompeve il cidinôr de gnot. Cualchidun al vierzeve la puarte di len de arie. Une slambri di lusôr di lune al veve fat intivâ la gabie.
Il frut al smicjave framieç lis sbaris, ma une rugnade feroce lu veve fat slontanâ di cualchi pas.
Cence pôre al jere tornât dongje. I siei voi a vevin incrosât chei dal Mostri.
Un colp sec e il clostri si jere crevât. La puarte de gabie si jere vierte.
— Scjampe! — Al veve dit il frut.
Une ultime voglade al zovin e intun marilamp la bestie si jere za pierdude inte jerbe alte.
Il scûr le platave dai oms. Lis stelis i mostravin la strade.