CorseCurte – Classifiche di Març

O sin al tierç mês di gare e la nestre iniziative e je al so cuart di ore e o sin rivâts ancje ae proclamazion dal prin risultât, chel dal Campion di Invier!

Si che, scomencìn cui risultâts dal mês di Març, altri biel mês cun 24 contis in gare e plui di cualchi biel toc che al pâr vê metût dacuardi zurie tecniche e zurie dai letôrs. Il teme, come che si visarês, al jere Fieste, e al è di dì che plui di cualchidun al à declinât il teme – di vêr furlan – intune maniere dramatiche, tragjiche o insome… cjolint la idee di Fieste in sens metaforic.

Come simpri, si pues viodi che lis contis plui indaûr in classifiche no son chês mancul bielis, ma chês che a son un pôc plui lontanis al concet di conte, stant che cheste e je une gare par contis e o vin capît che nus plâs sintîsi contâ storiis.

Insome… Pocjis cjacaris e ve chi la CLASSIFICHE DAL MÊS DI MARç, dal numar 1 al numar 24, cun dentri ducj i ponts ricevûts: zurie tecniche, dai letôrs, bonus e penalitâts.

Dôs contis a parin propit vê metût in rie dutis chês altris, e a son di dôs scuadris che aromai o vin capît a vogaran inte part alte de classifiche ancje tes zornadis che a vegnin. O fevelin dal Borussia Dordul e dal Cjicechepicjedispicjelacite che a son lis primis dôs in classifiche e ancje chês che a àn dominât la zurie dai letôrs, cun Pasche di bondance e ligrie e cun Flabe par une vite. Se no vês let lis lôr contis… leiet, che a meretin.

Ma daûr di lôr la int no je stade a cjalâ. O segnalin che la conte numar 18, Fieste di ce, dal Barba Pisul Stentadizza e je plasude al public e cundut di jessi une vore curte e à otignût buinis votazions ancje de jurie tecniche. E cussì la conte La suaze, dal Sbreghebalon, e à cjapât ancje un bonus di un zurât tecnic e si è fate valê. Ma in pratiche cui stes ponts, plui o mancul, ancje lis contis In viaç, dal Volketitrai-Liga, Il colôr dal an, dal Atletic Gjatui e Conte pal Judiç, dal Real Cocâl a son rivadis inte part alte de classifiche. Al siere chestis menzions la conte Sclopetadis e fusetis, di Sicheduncje, ancjemò une volte cuntune Fieste che no si pues dî fieste, ma che a à otignût bogns ponts e e je rivade subit daûr de part alte de classifiche.

E dopo la classifiche di Març, o podìn disvelâ la classifiche dal FANTACORSECURTE! Ben po… O vin un vincidôr di stagjon e come che o savês o vin vût un premi par lui. E achì o vin di fâ i compliments a cui che al lei dutis, MA PROPITE DUTIS, lis contis di contecurte e al à simpri chê gracie di lassâ un coment vivarôs par cui che lis à scritis. Ce saressie la nestre Ostarie cence Lussian di Varian! Sì, al è lui che ogni volte, di Zenâr a Març, al à imbrocade simpri une des contis che a son rivadis intes primis dôs e si è puartât a cjase il premi. (O miôr, o larìn a puartâial a cjase). La racuelte di contis dal Premi Richinvelda.

No le à vude facile, eh. Daûr o vin vût une Noemi Salva che e à un bon voli, ma ancje i inseguidôrs a son a une tîr di clap di ponts. La gare dal Fantacorsecurte e je inmò lungje…

E e je vignude la ore de classifiche gjenerâl, ancje se cualchidun al varà za intivât cui che al sarà il Campion di Unvier.

Vele chi!

O podês viodi che lis trê scuadris che a jerin in teste inte seconde zornade di campionât a si son confermadis a nivei alts e si son zuiadis il titul di Campion di Invier.

Le à puartade fûr Cjicechepicjedispicjelacite, ancje se di pôc. Ma daûr e je barufe. Se la zone Champions e je par cumò a disposizion di trê scuadris (in bande de Cjice, il Borussia Dordul e il Reâl Cocâl) o vin altris trê che si zuin il puest in Europa League (Volketitrai-Liga, Atletic Gjatui, Barba Pisul Stentadizza e Sbreghebalon) e altris come Sporting Brugnul, Motoguzzi, Passarute e Copasse blu che a spietin dome un pas fals par jentrâ e passâ devant. La gare e je inmò une vore lungje e no sarà facile mantignî chescj nivei. E nol è dite che al jentri cualchidun cul mês di Avrîl, pront se no altri a scombati par deventâ Campion di Vierte. Il teme des Bestiis al è pront par stiçâ.

Al è dut, par chest mês, o contatarin un par volte i trê prins classificâts par i premis. E… avanti cu la CorseCurte!

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît