CorseCurteMarç#06 – Fae’ntaestale Fest

#06 – Fae’ntaestale Fest

Chê peraule i travanave il çurviel di cualchi dì in ca. Ce volevie dî? Vevie a ce fâ cu la fantasie? Cun alc di fantastic? Jerial inglês? ‘Stale’ in inglês no vuelial dî ‘vieri’?
Al jere stât chel siorlui a picjâi intai pinsîrs chel carûl. Chel che al jere vignût a disbratâ il zardin de sô vile, che la grande fieste pai siei 50 agns e veve trasformât intun cjôt di no crodi. Fiestone: orchestre, mangjative di ogni fate, di bevi ce che bocje e voleve, di dut e di plui! Invidâts ducj di nivel, biele int, ben vistude.
Finide la fieste, cu la schene poiade cuintri la puarte sierade, la siore di 50 agns e veve vaiût. Intes orelis dutis lis cjacaris di chê serade. E dut il nuie che al jere dentri inta chei miârs e miârs di peraulis che e veve sintudis. Il vueit plui vueit. Sicu che e jere vueide la sô vite.
Tal doman chel siorlui, biel che al cjoleve su i vanzums de mangjative ‘jai doi alis mês bestiis, chês a crustin dut!’, i veve butade lì chê peraule. Che lui nol jere mai stât a une fieste come chê li, che la sô fieste e jere ‘fae’ntaestalefest’.
Nissun al veve savût a spiegâi di ce che al si tratave. Salacor e je une tindince gnove, un ‘must’, e nô che no savevin nancje! Ca i vûl informâsi, no si pues restâ indaûr cu lis modis! Il plui savint dai cognossincj al veve sentenziât che e jere une fieste vintage, ‘faentaestic steil fest’, valadì il rignuviment dal antîc, midiant de comunicazion globâl, che, ducj a san, e je fantastiche sedi intal sens che e je bielonone, sedi che si fonde su la fantasie.
La siore di 50 agns si zure che mai plui une fieste che le lassi a vaî di bessole par une setemane, cu la tentazion di disvuedâsi in bocje dute intun colp la flascjute des pirulis par durmî!
Pluitost… provâ une ‘fae’ntaesteile fest’? Parcè di no?
– Ma, siôr lui, ce robe ise cheste fae’ntaesticsteilfest?
– Eh, siore, viodie, jo o soi contadin, o ai bestiis e alore i vûl regolâlis chestis bestiis, no pues lâ alis fiestis parcè che o ai di…fâ inta stale.

di Laurin Zuan Nardin (Lupusinfabula)
#1210