CorseCurteFevrâr#25 – La semence spaziâl

#25 – La semence spaziâl

O ai viazât par cinc agns lûs tal spazi profont su la mê nâf spaziâl. Jo, Amanda Zamora, o soi la ultime abitante dal planet Aglaie, sdrumât di une vuere triste che e à glotût ancje chei che la vevin fate scaturî.
Dome une semence o ai rivât a puartâ vie di là. E tant o ai viazât che o ai cjatât il planet Zagreus, dulà che no je olme di creature vivent: di ogni bande il desert si slargje fin tal orizont.
La nâf spaziâl e sorvole une valade strete, si sbasse simpri plui, cence che o puedi fâ nuie si ferme: no si môf.
Po ben, o partìs a pît, o puarti cun me une scorte di aghe e la semence. Insom de valade al è un templi maestôs… forsit Zagreus nol è dal dut cence vite.
Il portâl si vierç cun fature, o jentri, e si siere bessôl daûr di me. Di un bûs dal sofit al jentre un lusôr smamît, uniche lûs tal templi antîc.
“Amanda Zamora, ultime de stirpe di Aglaie, ven indevant!”
Une vôs fonde e maestose mi salude. Un munic stravieli, cu la muse ingrispignade, al ven fûr de ombrene. “La puarte e jere vierte dome par te. E cumò no si vierzarà plui.
Ancje jo o soi l’ultin de mê gjernazie. Par agnorums o ai spietât e sperât che cualchidun al rivàs par dâ gnove vite a chest planet. Par dut chest timp o ai conservade la aghe de vite. Ma o soi bielzà masse vieli, no ai plui lis fuarcis.”
“Ma alore tu… tu mi spietavis. E jo o ai la semence de ultime plante dal gno planet, di Aglaie. La met achì, sot de viertidure dal templi, par che e vedi plui lusôr. Va a cjoli la aghe de vite!”
Il vieli nol è usât a cjapâ ordins. Ma al va e al torne cuntune butilie di veri celest. Al sparnice la aghe su la semence, e… maravee! Une pivide di lûs sflandorose si jeve su, si divît in fueis e vidiçs, che a deventin ramaçs e a van simpri plui adalt. E dopo des fueis a rivin flôrs a rap, a cjampane, a corimbi, cun corolis che si vierzin une parsore chê altre. Ju cjali incantesemade e no mi inacuarç che o stoi lant sù adalt ancje jo: une butade mi cres sot i pîts e mi puarte fin sui cops dal templi.
Il scûr mi involuce come un tabâr di vilût neri: o spieti la albe ca sù, albe di un mont che al tornarà a vivi.

di Stralunade (Atletic Gjatui)
#1200