Mê mari ‘a diseve
Gina Marpillero
Pordenon, 2000
CE LIBRI ISAL?
Un libri di 150 pagjinis, editât par cont de Biblioteca dell’immagine di Pordenon, inte golaine CHAOS. Une racuelte di mûts di dî di une volte, di filistocjis e di storiis. A ispirâ la autore une Clelie e un Fiorenzo di Dimplan, che di simpri a àn vude cheste passionate pe savietât dai timps che no son plui.
MA CE ISAL DENTRI, DI PRECÎS?
Proverbis, piçulis storiis de tradizion popolâr, striaments, detulis, induvinêi, dut dividût in cjapitui: amôr e matrimoni, lavôr, bêçs, fortune, bielece, salût, cualitât, compuartaments, il mangjâ, il timp, i difiets. In plui dîs storiutis e une schirie di ilustrazions di caratar ‘naïf’, dal artist Bianzan. Dutis lis parts par furlan a àn la traduzion par talian e cualchi notazion esplicative.
MA CUI ISAL L’ AUTÔR?
Gina Marpillero (1912-2008), e jere nassude in Cjargne, ma e à vivût la pluipart de vite a Udin. E veve ancje une cjase a Porpêt e le tignive tant che un bonbon, cjapantsi cure dal zardin fin ai ultims agns. E à scrit une vore sei in prose che in poesie, sei par talian che par furlan. Cul libri Essere di paese e à vinçût il premi Risit d’aur intal 1981.
A CUI I PUEDIAL PLASÊ?
A chei che ur plasin i proverbis, lis peraulis che in dì di vuê no si lis dopre plui. A chei che a àn voie di no dismenteâ la culture popolâr furlane inte sôs manifestazions plui sanciris, ancje se datadis intal timp.
E SE O AI VOIE DI CJOILU?
Li de Biblioteca dell’immagine a Pordenon, vie Villanova di sotto, 24; mail: info@bibliotecadellimmagine.it. E magari si pues cjatâlu ancje in librerie. O dutcâs, su amazon o altris buteghis on line.
