CorseCurteZenâr#9 – Tarlecs e comareçs tal fogolâr

#09 – Tarlecs e comareçs tal fogolâr

Tal fogolâr, par tiere coriandui e vanzums, Carnevâl, nas ros come un râf di broade, tai pîts çavatis che Diu nus vuardi, intor une palandrane blecade tant che un Arlechin e sul cjâf une papaline, al snacaie, al sgargaie e al tire mocui cuintri “il Guvier sassin che al bastone simpri chei”. Cu la code dal voli, al viôt jentrâ Cuaresime, in grisaie grivie come la cjaristie, ma no si scompon.
– Sêstu tu? Beromai ca? Mi par îr che al jere Nâdal.
– (Contant sui dêts) Un: cui varessie di jessi si no jo? Doi: al è passât un an, come ogni an.
– No baste spicigulâ sore mangjâ e bevi, misuristu ancje lis peraulis, cumò?
– Sigûr, par compensâ la straçarie dal mont. (Lu cjale) Dîs po, sêstu mal cuinçât?
– (Contant sui dêts ancje lui par fâi di spieli) Un pôc di colesterôl, un tic di rafredôr, un fregul di reumatics…
– Orpo, no tu varâs mighe cjapât il Covid? (Lu cjale miôr) No, dome strapaçs: cuant che si trate di sbacanâ, no ‘nd’è pandimie che a ten par te, nomo?
– Ce vivi saressial cence cualchi baracade in compagnie?
– Sì… de mascarine. Visiti: pocje gramule, une vore di salût. Scomet che tu ti sês intosseât a fuarce di fraiadis, bacanâi e guduladis.
– Malafenò; chest an, tantis verzis e pôc muset. Ancje il purcit al è deventât un lus cun chês crostis di paiâ di lûs e aghe. Però, mi soi fat une panzade di crostui e fritulis.
– Sì, e di babis di Colombine, e di cjacaris di Pantalon, e di blecs di Brighele, tant par no scontentâ nissun, ingort. (Sburtantlu fûr) Ti met ben jo in cuarantene cumò. (Cjalant i fruçons par tiere) Viôt chi ce cragne: aiar, netâ, disinfetâ… Pinitince, pinitince.
(E cjape un piç di cinise tal fogolâr e sal met sui cjavei). Miôr començâ daurman.
Carnevâl, tornât indaûr a cjoli sù la papaline, al mene il cjâf cun bocje di ridi.
– Eh, eh, a chei da la barete, nissun i le pete, ma, Guvier lari, cuintri Cuaresime… al mûr il virus.

di Rosute Pelote
#1159

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît