CorseCurteZenâr#20 – Lis mariutinis

#20 – Lis mariutinis

Siore Pine si jere jevade a binore plene di ligrie par vie da idee che i veve vignude dilunc la gnot. E veve impiât il fûc dal spargher e dopo gulizion, compagnadis lis dôs frutinis a scuele, e jere lade là da Morete a comprâ la stofe.
Jere une brave sartorie e di bessole e veve dissegnât su pagjinis di gjornâl i stamps par taiâ la stofe. Ca da Morete e veve cjatât un biel toc di coton colôr blu che al tirave viers il violut, doi metris di stofe rosse e dome un nie di nere. Dopo gustât e veve cjapât lis misuris a lis frutinis. La grande e veve siet agns e la piçule trê. Cu la sô matite e segnave tal librut la lungjece da manje, dal corpet, po dopo la gjambute e ator da vite.
Slargiade ben la stofe e poiât parsore i stamps e ferme cu lis guselutis la stofe e cul zes blanc e segne li formis diviersis. E passe il fîl d’imbastî sui segns blancs e dopo e tache a zontâ il devant cul daûr dal corpet, po dopo la braghesse lungje.
Finît di imbastî e clame la frute plui grande par fâ la prove dal model, simpri cul vignarul sul dêt e cjale ben cemût che al cole il dut, se son pleis di comedâ, la braghesse un pôc di scurtâ e vie indenant.
Dopo e passe ae cusidure cu la machine di cusî. La sô e je une Necchi che je e sa fâ cori movint cu lis gjambis sul pedâl.
Cumò e ven la part plui complicade. A son doi costums di carnevâl. E à pensât a dôs mariutinis. La stofe bluette e sarà il cuarp e cumò e à di inventâsi lis alutis. Va a cirî un pôc di fîl di fiar di chel lizêr e e fâs la forme de alute e dopo la cuvierç di stofe rosse e i tache parsore dai taronts neris. E clame lis frutis e e fâs la prove gjeneral. Sì, la robe e ven ben e Pine e je contente. Ce biele pensade che e à vût. Ta grande fieste di Carnevâl che ogni an si ten a Cormons ae “Lega” li sôs frutis a fasaran propit une biele figure.
Cuissà ce tantis Colombina, Arlecchino o Cow Boys a varessin viodût tal “Ballo delle bambole” a la “Lega”, ma dôs mariutinis a saressin stadis dome lôr!
Sul cjavut das frutis e met un diademe fat di fîl di fier e une veludine nere par formâ lis antenis.
Il dì da fieste e prepare lis dôs frutis. Ben petenadis, cu lis scarputis gnovis, metût sù il lôr biel vistît cun tant di alutis e antenis a van.
In tal salon da Leghe al è plen di mascarutis e zûcs, baldorie e confusion. Un aveniment impuartant par Cormons.
La dì dopo de fieste, sul Gazzettino dal 21 di Fevrâr 1958 un biel articul intitulat “Ultime dal Carnevale”. Sot di une biele fotografie in prin plan di dôs frutis che si tegnin par man si lei: “le sorelle Lesizza ammiratissime nel loro costume marziano”.

di Nene Furlane
#1170

6 comments On CorseCurteZenâr#20 – Lis mariutinis

Leave a reply:

Your email address will not be published.

This site uses Akismet to reduce spam. Learn how your comment data is processed.

Pît di pagjine dal sît