CorseCurteZenâr#17 – La bolp

#17 – La bolp

Lis gjambis ch’a no tegnin, il cûr ch’al piert un colp ca e un colp là, la buine memorie che, par ironie, e je dome un lontan ricuart. A otantecuatri agns la mê vite e sta lant ben planc, ma e sta lant viers l’ultime pagjine. No steit a pensâ mâl, la vite mi é plasude, ma o soi strac, une vore strac. Lis zornadis a son lungjis, soredut te condizion ch’e mi fâs stâ di siet di buinore a siet di sere devant dal barcon cui comedons su la plane. Se la mê cjase e fos amancul suntun biel bant e no suntune stradute asfaltade ch’a puarte in cimitieri, mi sintares mancul cu la Siore a tac.
Un gjatut, une biciclete, Pieri ogni dì a la stesse ore, nuie di plui tes mês zornadis.
Ma no vuê. Vuê e je passade une bolp. No la viodevi di vincj agns une bolp, di cuant che o lavi in Cadôr a vore ogni Istât in albierc e o cjaminavi fin sul Sorapis tai dîs libars.
Li, propit in Cadôr, al va l’ultim fruçon di memorie ch’o ai, cuant che devant di me e je passade une bolp di chês ch’a ti fàsin saltâ il bati dal cûr no par lis magagnis de etât, ma par chê emozion ch’a no à non, cualchidun i à provât, ma chê robe li no pos jessi mudade in simbui o in sunôrs.
1958, e jere la fieste di carnevâl che l’albierc al organizave ogni an, jo o stavi in sale pront par rispuindi a lis dibisugnis dai ospits, cuant che devant di me e je passade une zovine, disesiet agns, lis formis lizeris, un vistît un fregul masse lizêr pal mês di Fevrâr e la mascare di bolp che i platave dome nâs e voi.
No si spieghe, ma jo li o savevi che jê e jere la femine de mê vite. Jo o vevi une mascarute rosse cence sens, ma o varès vût di jessi vistût di marmote, prede di chê bolp ch’e veve distanât dutis lis mês debilecis e e veve metût intun cjanton, cence vie di fughe, il gno respîr.
Cussì la mê vite e je lade indevant fin a vuê, cuant che une bolp e je passade devant dal gno barcon e la man de bolp di chel 1958 si é poiade su la mê spale: “Viòdile, une bolp. Trop biei no jerino cuant ch’i jerin zovins.”

di Real Cocâl
#1167

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît