CorseCurteZenâr#03 – Ai confins de realtât

#03 – Ai confins de realtât

Intune sere di Fevrâr di cuatri agns fa o tornavi in automobil de citât al gno paîs. Dongje de ostarie di Pauli o ai cjapât un biel spac.
Inte penombre dongje de pese publiche dal vecjo negozi di coloniâi al jere un vistût di blanc cun maglis neris. O ai realizât che o jerin sot Carnavâl e chel al jere mascarât come un cjan de “Cjarie dai 101”. Si jerin cjalâts e dopo ognun al jere lât pe sô strade.
No ai mai vût trope passion di mascaris e mi soi inmascarât pocjis voltis te mê vite. Di Zorro, di piçul, e ducj mi coionavin: no vint mê mari une mantelute nere, mi jeri metût intor chê cu la crôs che ti devin al Batisim.
Po, di fantat, une bulade: cul cjapiel a cilindri, une mascare di simiot, une gjachetate maron cui blecs tai comedons o jeri vignût fûr de mê buteghe par jentrâ li di Pauli, juste di front. Daurman i bevons mi vevin cognossût. I vevin dit a gno pari: “Cjale Lido, to fi!”
E dopo a Halloween ta chê discoteche di Codroip, cuant che, vistût di strion, Anute (chê volte o jerin dome amîs) mi veve ricognossût distès de maniere in stîl “Toni Manero” che o balavi.
E sot dal tendon a Faedis cun sombrero messican e poncho. Mi visi! A jerin chei vistûts di Ghostbusters a butâ fûr aiar puçolent!

Mi sarès tant plasût vê la muse di Gommaflex, nemì di Alan Ford: il pote al podeve trasformâle secont il so estri e assumi la identitât di ducj ma mi plaseve une vore cuant che si faseve il nâs di purcit.
Ah, al è facil ancje par me fâlu. Cumò o soi devant dal spieli. O ai gjavât il veri de suaze di un dai ritrats in tal tinel e mal soi metût denant de muse; o sclaci il nâs sul veri e, cjalantmi, o viôt propit un purcit. Ce divertent che al è!

UUUUIIIKKK
UUUUIIIKKK

– Toniiii, ce fâstu tal bagno? O ai di lavâmi par lâ dal miedi. Moviti, ven fûr po! Adiu, cumò vonde, vierç, dai, ma no tu âs nancje sierade la puarte a clâf!? O jentri, eh! Ah, Signurut benedet, ce isal chi?

UUUUIIIKKK
UUUUIIIKKK

Anute e viodè une strane bestie colôr di rose vignî fûr dal bagn e scjampâ vie tal curtîl, lant bande dai strops di pestelacs dal zardin, fermâsi, nasâ, sgarfâ, rugnâ e po scjampâ vie inaltrò.

di Checo Tam (Tapioca City…)
#1153