CorseCurteZenâr#1 – Tomâtiere

#1 – Tomâtiere

Chel mont nol veve atmosfere, l´aiar al jere un spazi nocîf pal uman e la radiazion no permeteve il davuelzisi de vite al difûr des cjasis. A ogni mût chê civiltât e veve cjatât une maniere di rindi chel puest abitabil par campâ in societât. La uniche maniere di vivi adun al esterni des cjasis al jere dome doprant une sorte di mascare che ur concedeve no dome di respirâ, ma ancje di jessi protets des inclemencis climatichis. Par gjenerazions e gjenerazions a vevin vivût sot di chest puartament. Cuant che une persone e nasseve i vignive assegnade une mascare inmaneade daûr di un algoritmi pontât sul so ADN. Chel argagn lu compagnave fin ai siei ultins dîs e in mût unic e podeve jessi gjavade fûr intes cjasis de proprie famee e dome in presince dal nucli familiâr. Cheste usance no jere mai stade cuistionade e pardabon rispietade par ducj i efiets. A vevin cjatât une maniere di vivi in societât tignint bot a cheste detule. In gracie a di un fenomen climatic pôc a pôc la atmosfere e scomençà a jessi respirabil e i rais a deventarin inofensîfs. Daûr di cheste cundizion la int e tacà a gjavâ vie lis mascaris, ognidun al so timp si liberave de sô invistidure e si faseve fuart par confrontâ il gnûf clime e soredut chei altris. Propit in chei dîs, in gracie a cheste cundizion di ciere vierte, a tacarin i berdeis in chel marimont. Nissun ricognosseve nissun, a man a man che a tacavin i rapuarts al di fûr des fameis i smaneçs a palesavin interlocutôrs no dal dut arûts, i pinsîrs platâts a jessivin tra cjar e piel e lis relazions umanis a capitarin de spade di Damocli de socialitât. Prin di butâ par tiere secui di coesistence, chê societât e decidè di tornâ indaûr a doprâ lis mascaris e fin cumò o lin indevant a doprâlis. Di dulà sêstu, ipocritiere?

di Scalembrut
#1151

3 coments On CorseCurteZenâr#1 – Tomâtiere

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît