Nadâi

Inte foto: migrants jenfri Polonie e Bielorussie

Di spes si jevisi cun cualchi dulie e al ven di cjapâsile cun cualchidun, par solit cul Guvier, a voltis encje CUN CHEL ch’al sta plui adalt di nô, par vie ch’a nus baline pal cjâf che forsit, ogni tant, nol viôt tant ben. Dopo al tocje encje domandâ scuse, par vêlu tirât dentri tes robis che no si rive a capî, corezint il pensâ. Nô o sin d’imprest su cheste tiere e o fasìn ce ch’o podìn. Cjapìn il fat de fieste ch’o stin par memoreâ: le sô nassude. Lui, par dânus une drete, al à scugnût deventâ piçul piçul e nassi di dôs personis puaris ch’a scjampavin vie de lôr tiere par ciri un avignî. Mancumâl che biel cjaminant no si son inçopedâts, ni cun vuardis ni cun soldâts, se no cui sa ce ch’a i varès tocjât! Plens di frêt e fan, si son fermâts ta une stalute fûr man, dulà ch’a jerin encje un nemalut e un mussut, che cul lôr sborfâ lu àn scjaldât a pene nassût. A saludâlu e a puartâi alc a son rivâts i pastôrs ch’a jerin lenti, puars come lui. Però nô che o vin capît il sens di chest fat, par ripaiâlu di tant patî, ogni an par fâi onôr, o fasìn sù une grande fieste sflandorose: il Nadâl. Regâi, taulis plenis di ogni ben di Diu, cul nestri ingjegn i vin savoltât la fieste intun fat comerciâl. Dopo passûts e benvistûts, magari, si dismentein di cui che al mûr di fan e di frêt e par zonte o vin il coragjo di domandâi une gracie par ch’a nus judi!
Cui sa mai ce ch’al pensarà di no, chel puar piçul…

di Marisa Gregoris
#1147

2 coments On Nadâi

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît