Salvadis a stâ dongje

O vin gust di pandi une piçule gnove leterarie che inten al nestri Ostîr, ma la cjapìn come scuse par inviâ ancje une riflession sui temis che a son une vore dongje ai nestris.

Si fevele di Premis Leteraris, e in particolâr, la gnove e je che il nestri Ostîr, stiçât de Coghe, al è stât finalist intune manifestazion inmaneade de Pro Loco Monti del Sole, di Sospirolo, a un tîr di sclope di Belun, ven a stâ, pôc di là dal Vaiont. Se o volês lei la conte, che e je par talian, le cjatais discjamant chest pdf dal sît de proloco, insiemi cun chês altri contis finalistis. La conte, che si intitule “Foglioso” e fevele di une figure dal folclôr venit, l”Om Selvarech”, che al jere il teme dal concors, davuelt sedi a grancj, ma sedi, soredut, ai fruts des scuelis sot i cutuardis agns.

In struc, il Premi Leterari, che si clame “Sospirolo, tra leggende e misteri”, in bande di premiâ lis contis miôr cuntune zurie une vore di cualitât, al à metût adun une premiazion une vore ben jessude, che e je rivade a tirâ dongje plui o mancul un centenâr di fruts, coinvolzint lis classis des scuelis mezani e elementârs, e in pratica, stiçant centancj canais a scuvierzi e savent di plui suntune liende dal folklôr locâl, ma ancje cu lis tradizions (tal fâ il formadi) peadis. E il teme dal Om salvadi, une vore dongje ai nestris sbilfs o salvans, e in gjenerâl figure che si cjate in tantis culturis dal arc alpin,  al jere dome di chest an, stant che l’an passât a si fevelave di mistîrs discomparîts e i agns prin di altris argoments.

La riflession, cjalant la premiazion e il bon lavôr che al à metût dongje la robe, e je une vore imediade. Parcè no rivino a fâ compagn? Parcè si fasie tante fature a tirâ dongje fruts, ancje fasint une robe compagne a cheste (come in Vôs de Basse e la nestre Coghe)? Al pâr cuasi, e al splâs dîlu, che e sedi la lenghe a meti i baston tes ruedis dal argagn che al invie il machinari di un event. (Cjalait ce biel l’om selvadech che a vevin preparât, insiemi cu le femine, fat di fueis e vert, o il dissen de mostre fate di pueste) Achì, a lei a lis istituzions che a devin la poie ae robe, si leve de Regjon aes pro loco. Ca di no, invezit, si ben che a sedin cetantis pois, al pâr che lis istituzions o a scjampin, o si limitin a dâ un franc, ma dopo, une ativitât di gjestion no rive a jessi incisive. Ancje il coinvolziment des scuelis e dai fruts al somee jessi une vore dificil, stant che i mestris e i professôrs coinvolzûts e presincj si viodeve che a vevin fat un lavoron e che a jerin i prins a jessi entusiascj e contents di jessi li cu lis lôr classis (interiis!) e e jere domenie matine. Ca di no, a si contin sui dêts di un pâr di mans i professôrs e lis professoris che a àn nuviçade la cause de lenghe e de culture furlane, ancje se si è cussients che l’ambient scolastic – massime intai ultins doi agns – nol jude a meti in vore progjets e a stâi daûr.

Insome… ancje noaltris tant che Ostarie, o vin viodût come che al sedi dificil coinvolzi i plui zovins intal scrivi par furlan e intai events che o inmanein, cun dut che dopo, cuant che la int si cjate dentri, e pant simpri bonstâ e gust di vê partecipât.

Ma cuissà, timp o tart o cjatarin la recipe par cusî creste roture.

Voaltris contecurtârs, ce pensaiso?