L’Omenon

Nol jere distant di chel piçul cjasâl dulà che i vevin dât di mangjâ chel paston di vene.
Si jere cuasi indurmidît poiantsi cu la schene intor di un pôl. Si cjatà tal mieç dal insium e de vegle e al viodè cu la code dal voli une robe di no crodi… une grande ombre e talponave tal mieç de plane al clarôr de lune; nol podeve jessi… e pûr e jere vere… al jere un zigant! Un grant omenon che si moveve a pas luncs. Zuan di mieç indurmidît che al jere nol rivave a tirâsi sù. Al jere paralizât.
Un grant pidon si fermà a pocje distance dal arbul dulà che al pisulave. Al rivà un aiar fuart che al movè lis ramascjis. Po al capitâ un altri fat strani… il zigant si metè a pissâ propit parsore dal arbul di Zuan. Il fantat al jere dut imbombît ma ancjemò nol rivave a tirâsi sù. Al jere come incantesemât.
Po al sintì un rumôr lontan, come un rivoc… un rivoc che al rivave simpri plui dongje…
Il rimbombament al jere une vore fuart… dut intor di lui al tacà a balâ… finalmentri al rivâ a sveâsi.
Il zigant al jere sparît o miôr, nol jere mai stât. Zuan nol veve vût altri che un insium lucit… e infratant e jere ancje vignude la ploie a lavâlu: ve forsi parcè che si jere insumiât che il gjigant i ves pissât intor. Ma nol jere dut achì… il rimbombament al jere dovût a une fuarte scosse di taramot. Si sintive li dongje int che e zigave, odôr di polvar, berlâ di bestiis.
Zuan si alçà sù e svelt come un jeur al tacà a cori bande dal cjasâl. Rivât li al viodè un grum di pieris e une fantacine che e berlave come une mate. E veve une cjandele in man. Une part de cjase e jere colade ma la cusine e jere ancjemò in pîts. Si jere salvade parcè che e jere restade in cusine.
E jere in lagrimis. I siei a jerin restâts a durmî e la scosse ju veve sapulîts. Si sintive il pari che al berlave sot des maseriis.
Zuan e la zovine a tacarin a tirâ vie pieris e trâfs. E jere une grande fature ma a lerin indevant cu la fuarce de disperazion fin cuant che la vôs dal pari de zovine si sintì simpri plui fuarte. E saltà fûr une man…

di Milio dai Cjans
#1134
Conte cjolte dal Pôrecurte Day 2021

 

1 coments On L’Omenon

  • E ancje Miliu al ‘à tirât fur le storie dal orcolat, sôl che intal insiumiasi ,une pissade intôr no al è cui sa ce, ma i claps sdrumâts parsore di chel puar om, je cjosse une vorone tant di piês . Le biele vene di Miliu intal salâ lis contis no finis mai. Lussian

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît