Cryptostîr e Cryptofriûl

Mandi, chi us fevele l’Ostîr in persone, e cjalait… la gnove e je cetant frescje, che bisugne propit che o spindi subit cualchi peraule in libertât par ducj i Contecurtârs, che si meretin di savê subite dut!

La gnove? Îr di sere, a Codroip, o ai vinçût il Premi San Simon, cuntun libri dal titul Cryptofriûl! E us parie pôc? Sì, sì, mi soi bielzà sintût lis solitis frasis dal tipo: “ma vonde” “ma simpri tu” e v.i. cun dongje i compliments, e us disarai che invezit jo o soi content. No rivarès mai a disi a un che al cree alc di artistic e che al ven preseât di smeti di produzilu, ven a stâi che soi content di vê vinçût une altre volte, ma soredut che il libri al sedi stât publicât  😀

E lassant stâ chest gno jessi super content, mai come cheste volte il premi al è merit di un lavôr coletîf, fat cul jutori di tante altri int, a scomençâ dai dissens di Laurinç Marangon e de poie sientificiche zoologjiche di Luche Filipuzzi. Ma indispensabil al è stât il jutori de nestre coghe Serene, aromai editor insostituibile, che mi cuince simpri dutis lis contis. Ma une biele man me àn dade ancje la Sartore e la Bibliocheche, se si tratave di cumbinâmi libris che mi coventavin, e Zuanluche Franc e Carli Pup, a stiçami su argoments che no cognossevi, e Donato Toffoli, jutori inte cjace aes poesiis scognossudis, e Gianluca Morena, pe cuvierte, e Max Medina, pe poie sul mâc Licio Moroso, e une gjatemarangule a stimâ il nuclei naratîf, e i Piçui Aiutants Jacum e Ricart e Meri a fâ il tifo, e dute la clape dai Argjentins che mi insegne simpri alc di gnûf… e insome, no pues propit dî di vê vinçût di bessôl, ancje se o jeri vonde convint di vê fat un bon lavôr e di vê metût dongje une idee origjinâl.

Ma cuale ise cheste idee? Bisugne che us spieghi! Alore… la part narative dal libri a son 6 novelis. Novelis tal sens che a son contis lungjutis, che a tirin plui flât e a permetin di cognossi miôr ambientazions e personaçs. Ma dulà aio cjolt lis storiis? Une storie ogni cirche 10 agns, a scomençâ dai agns Vincj fintremai a rivâ ai Agns Setante. Ogni conte e come un salt intune epoche, e in efiets la idee e jere chê di fâ un salt intun Friûl diferent e de ete che e ven prime dal rivâ de television. Ma il fat di lâ indaûr tal timp e jere dome une scuse par podê lâ a cirî dai personaçs o dai aveniments che no si cognossin o a son stâts smenteâts. E ae fin di ogni conte si dîs ce che al jere vêr e ce che invezit al podeve ancje no jessîlu.

Ma stant che la peeraule clâf e jere la maravee, dentri in ogni storie si fevele di une bestie maraveose. Une bestie scamenbre e pôc cognossude, e propit par chest, par capî miôr cheste part zoologjiche dal lavôr, a son stâts inserîts dai dissens e une descrizion sientifiche de bestie. Ma stant che o sin ducj ancje ce che a contin di nô, a son stadis ripuartadis ancje lis liendis plui impuartantis su chescj nemâi.

Finide? No. Par stiçâ i letôrs ogni conte e je introdusude di un blec di poesie di autôrs ancje chei pôc cognossûts, ognidune scrite tal an che e je ambientade la conte.

Al è saltât fûr un libri cuntune struture semplice, ma che e messede narative storiche e fantastiche, didatiche, poesie e art figurative, e dulà che la maravee e varès di jessi avonde presinte in ogni pagjine.

Jo mi soi divertût une vore a scrivilu, ancje se e je stade pardabon une fature, soredut inte ricercje des ambientazions storichis. Podopo, lis storiis, a fevelin di vite, come simpri, e a mi mi someave che a fossin bielis storiis.

Al è dut… Un graciis a ducj, di cûr, e… BON CRYPTOFRIÛL!

1 coments On Cryptostîr e Cryptofriûl

  • Le bielece e sta intal fat che une persone zovine come Rafaele si interessi de storie dal nestri Friûl cun vive passion, e nol lasse murî il timp stât, tignint impiadis costumancis e tradizions varîs, e di ce che o ài capît al’ à fat une tumîe di ducj i aveniments in mût di capî miôr le lôr sostance. E dopo tirant lis sumis su lis critichis ” Al è simpri chel “, ancje il scrivi al’è un “sport” indulà il italic dit al conte “IMPORTANTE NON VINCERE; MA PARTECIPARE” che jô e zontares chel altri “VINCA IL MIGLIORE” Compliments Raffaele, onôr par noaltris clients de ostarie. Lussian

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît