Contis curte te Panarie – Setembar 2021

E ancje se tart, o vin gust di visâus che come ogni trê mês e je jessude La Panarie, la riviste di culture furlane, plene di articui e gnovis e… ancje cualchidune des nestris contis, tal cjanton che nus regalin a ogni numâr.
Ve chi la introduzion dal Ostîr par discuvierzi ce che al è dentri!
O sin in spiete dal frêt, che al puarti un pôc plui di cuiet, tes storiis di ducj, e alore ancje in chest cjanton de Ostarie o sin lâts a tirâ fûr dal camarin cualchi storie cuiete, di Sierade, par gjavâi vie il polvar e tornâ a dai une cerce. La prime conte e je une rivade nuiemancul che dal 2009, an de nassude di Contecurte, e e nus fevele di une Piece rosse. Ma come che al faseve simpri Frank Spada, pseudonim dal autôr, che nus à lassât une grampe di noir-jazz une vore origjinâi, no si capìs ben dulà che al vûl rivâ. Ae fin de storie, tirâts dentri intune Cividât une vore dumiestie, al pâr simpri di jessi rivâts a capî alc, ma no dut, ma ae fin, al è biel cussì.
E dopo di cheste o tornìn indaûr tal timp da cavalîrs… ma no, no chei de Ete di Mieç, ma chei che a àn fat deventâ il morâr un arbul “bandiere” dal panorame gjeografic furlan. Par no fevelâ dal mût di dî “lâ in vacje”. O sin tal 2012 e i fruts de 3A e 3B de scuele medie di Buri, cul jutori dal Ostîr, a àn metût dongje une conte che plui che contâ une storie e poie une cjalade sul Friûl di un timp, doprant peraulis e situazions di chê volte. E je saltade fûr une conte “di gale”, buine par cui che si pierderà tai ricuarts, ma ancje par chei che a scuvierzaran robis che no san, come par Sisto e cavalîrs.
E stant che cu la Sierade al ven ancje il timp dal purcit, a nin a cjoli une conte di un nestri contecurtâr che al è a stâ di là de aghe… e par aghe o intindin l’ocean. O fevelìn di Galliano di Buenos Aires che al è pardabon mestri tal misurâ lis contis, che zirant ator ator dai doimil caratars a rivin simpri li che a àn di rivâ. Provait cun cheste, dal 2019, che us fevele da L’om dai çucui, e soredut di Doro, cjapât dentri dai siei pinsîrs di frut. Une conte che e mostre come che ancje une fufigne e pues contâ une siore conte.
E par sierâ, o nin a cjoli alc che al fâs ridi e pensâ. Alc di curt curt. E te ostarie cuant al covente alc cussì al è soredut un che al sa poiâle ben: Laurin Zuan Nardin. Provait, provait a viodi, ce che nus à contât, in cheste dal 2018, di Siôrs e Puars…

L’Ostîr
par il cjanton di Contis inte Panarie
dal n° 210 dal Setembar 2021

E par abonâsi a la riviste, scriveit a info@lapanarie.it o vait a fâ un scjampon inte librarie La Tarantola o butait un voli al editôr La Nuova Base.

2 coments On Contis curte te Panarie – Setembar 2021

  • Un graciis al Ostîr par vê metût la mê conte “L’om dai çucui” te prestigjose riviste La Panarie. Jo di frut o ai cognossût a un tal che al cjaminave come Doro Çus… la fantasie e à fat il rest. Mandi

  • Il plasè di savê che le panarie, di cumò indevant no ten sôl pan e companadi , ma ancje un bon bevi, graciis ae nestre osterie, e par di plui cuntune buine butilie Argjentine ufride da lis miôr vignis di Galiano. Lussian

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît