Pirulis di aganis 1

Une agane te mê cjase

Une sere cuiete di Istât, cuant che o levi tal zardin par bagnâ lis plantis, o viodei un curiôs acjadiment.
La lune e slusive, grande e misteriose.
O vevi lassât un seglot intun cjanton dal curtîl, plen di aghe che e tremave. Mi veve spicât la curiositât.
Mi svicinai.
La aghe e tremolave. Si podeve viodi, jenfri lis ondis, une biele linie che e someave di vê un vistît blanç. Ogni tant si viodeve une muse lancurose, plen di dolôr. Tal stès timp si scomençà a sintî un berli orent. Mi taponai lis orelis, la so intensitât e spaurive!
No savevi ce fâ.
No pensai masse! O cjapai il seglot e tirai vie la aghe te tiere, che e veve scomençâr subit a clopâ!
Di bot, cidin complet.
No vei nancje un minut di polse che dut al tornâ a scomençâ. Ancje jo o scomençâi, però a cjantâ, plui e plui fuart!
I veve plasût. Il rumôr si jere planc planc bonât.
O crodei che dut al fos finît, ma sigûr che no!
Ogni volte che o voi tal zardin a bagnâ lis mês plantis, la tiere e tremole e si sint un dolç rumôr.
E jê, lu sai. Mi compagne, mi viôt.

Norma Romotowski
#1116

A presit di agane

Daspò che si sin maridâts, o vin comprât una cjase a bon presit dongje il Tiliment. No savevin parcè che e costave cussì pôc.
Un dì o vin cjatât olmis strambis mai viodudis jenfri il curtîl e il flum. E jere buinore e la fumate dapardut. Finalmentri le vin viodude: une femine in zenoglon cui pîts diformâts, e une smorfie di sopuartâ un dolôr fuart. Nus à sintût e di bot e sclop e je sparide al ripâr de fumate.
Si sin spaventâts cetant che o vin decidût subit di vendi la cjase cu la agane a un presit di fâ ridi i claps.

Javier Moscufo
#1117

1 coments On Pirulis di aganis 1

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît