Frazions

Un testament cussì strambot come chel che al veve lassât Valerian, che diu i dei dulà che al è, nissun si visave di vêlu sintût. Mieç, un tierç, un novesim. Pino, il studiât dal paîs, che ducj a lavin li di lui par robis di chê fate, al veve stuarzude la bocje, ce vuelie dî chê robe culì? Ah, no mi impaci jo, rangjaitsi!
Intai ultims timps in tancj a vevin viodût puar Valerian, recuie, che al si meteve a scarabocjâ cuntune matitone sun tun sfuei, al pensave, al scriveve un numar, lu cancelave, al tornave a scrivi, al gratave la orele, al suspirave. E dute cheste pantumime par parturî un test di cheste fate! Ma, puar om, come vîf, chel lì al jere lât fûr cul casselot!
Par chel che al intendeve i cjamps e la cjase, nuie ce dî, dut a puest. Il gredei al jere su la stale, sulis vacjis.
Alore: al prin fì, che al veve non Primo, miezis tantis des vacjis. Al secont che al veve non Secondo un tierç des vacjis. Al tierç che, par no sbaliâ, al veve non Venturo, un novesim des vacjis. Ma dulà isal lât a sgarfâlis fûr chestis frazions chel benedet om, che il Signor lu vedi in recuie?! Inte stale di Valerian lis vacjis a jerin 17!!!
Mieç di disesiet al è vot e mieç. Vino di taiâ la vacje pal mieç? E po chê altre mieze a cui i vaie? A Secondo? No, po! Che disesiet dividût par trê no fasial cinc virgule sîs? E Venturo? Une vacie, virgule vot, vot e alc! Robis di mats!
E alore? Mieç paîs al cuistionave devant de stale des 17 vacjis e al tirave fûr ideis: vendèitlis dutis e spartìtsi i bêçs, mandaitlis al macel e spartìtsi la cjar, faseit fente che vuestri pari, che diu i dei, al sedi ancjemò vîf e lait in devant come prime, lait a sintî un avocat, un studiât plui studiât di Pino. Ogniun al si sintive in dovê di proponi.
Dome ‘Sefut al scoltave e al taseve. Un omenut di nuie, di pocjis peraulis, che al veve cif e çaf a jemplâ la cite ogni dì. Ma chês pocjis voltis che al fevelave lis sôs a jerin peraulis!
Nissun si vise che a un ciert pont al è sparît e velu cumò che al torne planchìn cjaminant a pâr di une vacje che le ten pe cjaveze, la sô vacje, al à dome chê. E dut un colp ducj a tasin. Ducj lu cjalin lui, come incantesemâts.
Ce fastu, Sefut?
Al sa ben lui ce che al à di fâ. Al mene la sô vacje dentri inte stale des 17.
Cumò a son 18.
Sì, ma une no je nestre, no si pues mighe…
Muci! Miezis a Primo, 9.
Ma…
Sito! Muci! Un tierç a Secondo, 6.
Ma…
Shhh! Sito! Muci! Un novesim a Venturo, 2.
Ma…
9+6+2… trop fasial?
Ehm… 17, ma eeeeh… no son… e vanze une, no, e vanzarès, no, ma, ma, però, ma però… e vanze…
Une e vanze, sì. La mê. O torni a menamile inte mê stalute.

di Laurin Zuan Nardin
#1106

1 coments On Frazions

  • Ulio dai cruks al veve un grun di bestis te stale, e di jê vignive fûr tant di chel ledan ancje di vendi, ma une volte cjamât sul cjâr nol saveve stimà le misure pal presit, e cussi al lave a domanda jutori ulì che mancul varès volût, dal sior plevan , il plevan dopo fat le cubature, al lave vie disint ” e dopo a disin che ai vuel ledan e no plevan” . Lussian

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît